Elm və Təhsil Nazirliyi Respublika Uşaq-Gənclər İnkişaf Mərkəzinin təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş I “Yaşıl şəbəkə” festivalı təşkil edilib.

Bu barədə tehsil.media - a Respublika Uşaq-Gənclər İnkişaf Mərkəzindən məlumat verilib. Bildirilib ki, “Yaşıl şəbəkə” festivalı “Ekoloji yönümlü və enerji effektli yaşıl məktəblər” layihəsi çərçivəsində məktəblilərin VIII ekoloji forumu, “Dayanıqlı həyat tərzi üçün çağırışlar” ekostartaplar müsabiqəsi və “Gənc təbiətsevərlər” hərəkatını özündə birləşdirib.

Festivalın məqsədi uşaqlar, gənclər və aparıcı ekspertlər arasında sıx qarşılıqlı əlaqələrin qurulması, ətraf mühitin vəziyyətinə biganə olmayan və aktiv fəaliyyətə hazır olan gənc liderlər cəmiyyətinin inkişaf etdirilməsi, uşaq və gənclərin innovativ ideyalarının inkişafı və həyata keçirilməsi üçün əlverişli mühitin yaradılmasıdır.

Birinci “Yaşıl şəbəkə” festivalında Bakı şəhərinin 40 ümumtəhsil məktəbindən 200 nəfər ekoklub üzvü, Mingəçevir şəhəri, Lənkəran, Qax və Quba rayon uşaq-gənclər inkişaf mərkəzlərinin dərnək üzvləri qatılıblar. Festivalda Ekologiya və Təbii Sərvətlər Nazirliyi, UNICEF, FAO, UNDP, BMT-nin İnkişaf Proqramı, Tusi-Bohm Planetariumdan rəsmi nümayəndələr və iqlim elçiləri iştirak ediblər.

Tədbirdə Respublika Uşaq-Gənclər İnkişaf Mərkəzinin direktoru Firuzə Sultan-zadə “Orqanik məktəb bağı”, “Dayanıqlı həyat tərzi üçün çağırışlar”, “Gələcəyə hər kəs götürülməyəcək. Texnologiyalar təbiətin keşiyində” layihələri haqqında məlumat verib. Bildirilib ki, Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi haqqında ölkə Prezidentinin Sərəncamında qeyd olunanları nəzərə alaraq festival çərçivəsində gələn il ərzində ekoklub liderləri arasında ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində maarifləndirmə işlərinin davam etdirilməsi nəzərdə tutulub.

Festivalda 6 panel sessiyada qida (sağlam və rasional qidalanma, qida təhlükəsizliyi, qida sənayesi sahəsində innovativ texnologiyalar), aqro (orqanik kənd təsərrüfatı və aqrobimüxtəliflik), mobillik (ekoloji nəqliyyatın üstünlükləri, dayanıqlı turizm), ev (“ağıllı” ev və ekoloji vərdişlərin və davranışların formalaşması), istehlak (dayanıqlı istehlak, tullantıların idarə edilməsi), iqlim (iqlim probleminin innovativ həll yolları) üzrə məktəblilərin innovativ startaplarının təqdimatı olub.

Layihələr innovativ, texnoloji, ekoloji və dayanıqlılıq meyarları baxımından peşəkar münsiflər heyəti tərəfindən qiymətləndirilib və seçilmiş 6 ekoloji startap akselerasiya proqramına keçmək hüququ qazanıb.

Sonda bütün iştirakçılara sertifikat və diplomlar təqdim olunub.