9 – 13 fevral 2026-cı il tarixlərində Dövlət İmtahan Mərkəzinin Səriştələrin və peşəkar potensialın qiymətləndirilməsi şöbəsinin müdiri Pərviz Kazımov və Funksional səriştələrin qiymətləndirilməsi sektorunun müdiri Xavər Dadaşova tərəfindən Qazaxıstan Respublikasının Prezidenti yanında Dövlət İdarəçilik Akademiyasının əməkdaşları üçün “Psixoloji qiymətləndirmə və testlərin hazırlanması” mövzusunda təlim keçilib.

AzEdu.az xəbər verir ki, təlim iştirakçıları sessiyalar müddətində diaqnostik və qiymətləndirmə alətlərinin fərqi və tətbiqi məqsədləri, alətlərin hazırlanma qaydaları, situasiya mühakimə test tapşırıqlarının yazılması və ekspertizası, psixometrik keyfiyyətin qiymətləndirilməsi (etibarlılıq/validlik), nəticələrin şərh edilməsi və alət tətbiqində etika mövzularını nəzəri və praktiki bloklar əsasında mənimsəyiblər.

Təlim proqramının yekun mərhələsində iştirakçıların öyrəndikləri mövzuları bir çərçivədə birləşdirməsinə və əsas anlayışları sistemləşdirməsinə xidmət edən qısa test də keçirilib. Təlimin sonunda iştirakçılara sertifikatlar təqdim olunub.