Elm və Təhsil Nazirliyi Respublika Uşaq-Gənclər İnkişaf Mərkəzinin (RUGİM) gənc əməkdaşları, ekoklub üzvləri və könüllüləri BMT Ətraf mühit proqramı (UNEP) və BMT sisteminin Əməkdaşları kolleci (United Nations System Staff College - UNSSC) tərəfindən keçirilən “Mənim dayanıqlı həyat tərzim” çağırışı üzrə 6 həftəlik proqramda uğurla iştirak edərək UNSSC-nin sertifikatına layiq görülüblər.

RUGİM-dən "tehsil.media"a bildirilib ki, “Mənim dayanıqlı həyat tərzim” proqramı uşaq və gənclər arasında daha yaxşı, sağlam, ədalətli prinsiplərə uyğun yaşam tərzinin seçilməsini, dayanıqlı addımların atılması üçün əsaslandırılmış məlumatlar təklif edir. Proqram iştirakçıları daha davamlı həyat tərzi sürmək üçün effektiv tədbirlər görməyə çağırır.

Qeyd etmək istərdik ki, proqramda 3500-ə yaxın müraciətdən 1000-ə yaxın seçilmiş iştirakçı arasından 45 nəfər RUGİM-in “Yaşıl şəbəkə” ekoloji maarifləndirmə proqramına daxil olan ekoklub üzvləri Azərbaycanı təmsil edib, onlardan 20 nəfər proqramı müvəffəqiyyətlə bitirərək, sertifikat əldə edib.