ARTİ əvvəl açıq dərs, sonra nümunəvi dərs, indi də “ustad dərsi” adı altında dərslər keçirir. Ad dəyişir, mahiyyət eynidir. Olsun, əgər bir müsbət irəliləyiş olacaqsa, nə xoş. Amma olmur!

Tehsilmedia.az qeyd edir ki, bütün ölkədə, Regionallar da, məktəblərdə ustad dərslər keçirilir. Müəllimləri məcbur edirlər ki, hamı ustad dərsi keçməlidir. Amma planlaşma üçün verilən şablon, qurulan dərs tamamilə keçmişdən qalan, heç bir elmi əsası olmayan, yeniliyə uyğun olmayan planlaşmalardır.
İcmala baxırsan: dərsin tipi, dərsin forması, 7 mərhələ, dəqiqələr saniyəsinə qədər yazılıb.
Bunlar illər əvvəlki metodik qəliblərdir. Planlaşdırma çoxdan dəyişib. Yeni icmal şablonları var. Dəqiqə yazmaq anlayışı metodikadan çıxarılıb. “Dərsin tipi”, “dərsin forması” anlayışları ümumiyyətlə müasir metodikada yoxdur. Bəs niyə hələ də zorla tətbiq olunur?
7 mərhələnin hamısı niyə hər dərsdə istifadə edilməlidir? Kim deyib bunu? Hansı elmi əsasla? Hansı metodik mənbəyə söykənir? Elə bir dənə qrup işi salırlar, adını da qoyurlar “interaktiv dərs”. Bu nə interaktivlikdir? Bu nə səviyyəsizlikdir?
Bütün fənlər eyni şablonla yazılır.
Təbiət elmləri də, dəqiq elmlər də, humanitar fənlər də. Halbuki təbiət elmləri 5E modeli ilə, humanitar fənlər interaktiv modellərlə planlaşdırılmalıdır. Burada fənnin məntiqi haradadır? Metodiki fərqlilik haradadır? Fərdilik haradadır?
Hansına “ustad dərsi” deyirsiniz?
Yenilik haradadır?
Müəllimin ustalığı haradadır?
Şagirdin düşünməsi haradadır?
Bu, metodika deyil.
Bu, yenilik deyil.
Bu, ustadlıq deyil.
Bu, biabırçılıqdır.
Bu, cəhalətin sistemləşdirilmiş formasıdır.
Bu, təhsili kağız üzərində idarə edən bir mexanizmdir.

ARTİ dayanmadan layihələrə, təlimlərə maliyyə tələb edir. Amma ortada heç nə yoxdur.
Guya metodistlər hazırlayıb, dərsdinləmələrdə otururlar. Direktor müavinləri də dərs dinləmədə oturur. Amma bir nəfər belə demir: “Bu nə icmaldır?” Yəni bir savadı olan çıxıb demir ki, bu nədir yazmısız, bu nədir ustad dərs kimi bizi biabr edirsiniz?!

ARTİ-nin direktor müavinlərinə, metodistlərə təlim keçməsi üçün ayrılan pulların real nəticəsi budurmu? İllərlə xərclənən vəsaitin sonu bu qədər səthi, köhnəlmiş, savadsız planlardırmı?

Yalandan gündə bir “oyun ” çıxarmaqla olmur. Əgər həqiqətən nəsə edə bilmirsinizsə, heç olmasa müəllimləri də narahat etməyin. Sizin “ustad dərsləri” tarixə təhsilin necə korlandığının canlı nümunəsi kimi düşür.