Ölkənin təhsil sistemində şagird və tələbələrə analitik və kreativ düşüncə, motivasiya və özünütanıma, daima öyrənmə həvəsi, dözümlülük, çeviklik, empatiya hissi və dinləmə bacarığı kimi vərdişlər aşılanmır. Tədris proqramları bu yeni çağırışlara adekvat deyil.

 

Bu fikirləri "xəbərertəsi"nə təhsil eksperti Vüsal Kərimli deyib. O bildirib ki, belə bacarıqlar sadəcə özəl məktəb və universitetlərdə formalaşdırılır. 

Orta statistik azərbaycan tələbəsini təhlil etsək, görəcəyik ki, daha çox nəzəri bilikləri yüksəkdir. Bir çox tədris proqramı sovetlərin dönəmindən qalıb. Orta məktəbdə də müəyyən sahələrdə islahatlar aparılıb. 

Vüsal Kərimli deyir ki, araşdırma nəticəsində əmək bazarının əsas tələblərindən olan ünsiyyətqurma, komandada işləmək bacarığının olmaması və texnoloji biliklərin yetərsizliyi ortaya çıxıb. Ekspert vurğulayır ki, xüsusilə ali təhsil müəssisələri əmək bazarına uyğun tədris formatı müəyyənləşdirməlidir. Bundan başqa istər ali, istərsə də orta məktəblərdə dərslər nəzəriyyəylə yekunlaşmamalıdır. 

Məsələ ilə bağlı Elm və Təhsil Nazirliyinin ümumi və məktəbəqədər təhsildən məzmun, tədris və qiymətləndirmə şöbəsinin müdiri Vəfa Yaqublu bildirir ki, orta məktəblərdə bu bacarıqların aşılanması müəllimlərin verdiyi tapşırıqlardan asılıdır. 

Əgər müəllim şagirddən sadəcə faktoloji tapşırıqlar tələb edirsə, bu yalnız hafizəyə əsaslanan suallardır. 

Şöbə müdirinin sözlərinə görə, son vaxtlar məktəblərdə layihə yönümlü tapşırıqlar artıb.  Bunun da sayəsində şagirdlərdə sözügedən bacarıqları inkişaf etdirmək mümkündür. 

Nazir müşaviri Nicat Məmmədli bildirir ki, ali təhsildə dövlət standartları formalaşdırılarkən qeyd olunan məsələlər nəzərə alınmalıdır. 

Hər beş ildən bir ali təhsil müəssisələrinin akkreditasiyası keçirilir. Bu zaman universitetlərin performansları və tədris forması da qiymətləndirilir.