Azərbaycanda hazırda 31 özəl məktəb fəaliyyət göstərir. Onların da illik ödənişi ildən-ilə artmaqdadır. Məktəblərin illik ödənişlərinin məbləği ibtidai və yuxarı siniflərə görə dəyişir. Məsələn ötən il ibtidai siniflərdə 2000 manat olan illik ödəniş 3500 manata, 6400 manat olan illik ödəniş 8000 manata, 15 min manat olan liseyin təhsil haqqı isə 16 min 500 manata yüksəlib. Bu sadaladıqlarımız ibtidai siniflər üçün nəzərdə tutulan qiymətlərdir. Yuxarı siniflər üçün isə illik ödəniş qiymətləri daha yüksəkdir. Ötən il yuxarı siniflər üçün 6000 manat olan illik ödəniş 7500 manata, 8000 manat 9500 manata, 13000 manat olan illik ödəniş isə 15000 manata yüksəlib. Qeyd olunan qiymətlər tədris dilinə, təşkil olunan dərnəklərə görə də dəyişir. Bir sözlə, uşağın 11 illik təhsil alması valideynə 50000-100000 manata vəsaitə başa gəlir. Həmin valideynlər də qiymətlərin yüksəlməsindən narahat olduqlarını bildiriblər. 

Təhsil eksperti Kamran Əsədov bildirib ki, özəl məktəblərin illik təhsil haqqı 4000 manatı keçməməlidir. O qeyd edib ki, həmin məktəblərin monitorinqi aparılıb və onların göstərdiyi xidmətlər 7000-8000 manatllıq deyil. Ekspert bildirib ki, özəl məktəblər təhsil haqqını 20 faizdən 60 faizə qədər qaldırıblar. Keyfiyyətli təhsili təmin etmək üçün dövlət özəl məktəbləri vergidən azad etməlidir. 

Elm və Təhsil Nazirliyindən bildirilib ki, onlar yalnız özəl məktəblərin tədrisinə nəzarət edirlər. Məktəblərin maliyyə məsələlərinə nazirlik müdaxilə etmir.