Ümumdünya Təbiəti Mühafizə Fondunun Azərbaycan nümayəndəliyinin direktoru Elşad Əsgərov Bakı Dövlət Universitetinin (BDU) Ekologiya və torpaqşünaslıq fakültəsinin tələbələrinə "Azərbaycanda nadir növlərin mühafizəsi və bərpası” mövzusunda mühazirə oxuyub.

Bu barədə "tehsil.media"a BDU-dan bildirilib.

O qeyd edib ki, Azərbaycan Qafqaz ekoregionunun bir parçası kimi zəngin biomüxtəlifliyə malikdir. Biomüxtəlifliyin bu cür zəngin olması coğrafi mövqe və landşaft müxtəlifliyindən irəli gəlir. Azərbaycanda Xəzər dənizi sahili boyunca milyonlarla quş növü ənənəvi yaz-payız köçü edir, onlardan bir çoxu ölkəmizdə qışlamaya qalır. Bütün bu zənginliyin qorunması üçün respublikamızda Xüsusi Mühafizə Olunan Təbiət Əraziləri şəbəkəsi mövcuddur. Son 20 ildə bu şəbəkənin ümumi ərazisi 2 dəfə genişlənib, 10 milli park yaradılıb. Bu ay Azərbaycan Respublikasının "Qırmızı kitab”ının 3-cü nəşri işıq üzü görəcək.

Bir sıra nadir növlərin bərpası üçün beynəlxalq layihələr icra olunur. Ceyranların tarixi arealının bərpası məqsədilə reintroduksiya tədbirləri həyata keçirilir.

Elşad Əsgərov çöl ekspedisiyaları zamanı istifadə olunan foto-tələlərdən və GPS xaltalardan da bəhs edib. Bildirib ki, həmin müasir avadanlıqların heyvanların miqrasiya trayektoriyasının müəyyənləşdirilməsində böyük rolu var. Aparılan monitorinqlər sayəsində Naxçıvan ərazisində bir sıra heyvan növlərinin sayında artım müşahidə olunub. Bu isə Naxçıvan Muxtar Respublikasının ərazisində heyvanların qanunsuz ovlanmasına qadağa qoyulması, bitki örtüyünün artması və təbiətə göstərilən qayğı sayəsində mümkün olub. Dağ keçisi və muflonların təbii artımı burada yaşayan bəbirlərdə də nəsil artımının müşahidə olunmasına səbəb olub.

Sonra tədbir iştirakçılarının sualları cavablandırılıb.