2022-2023-cü tədris ilində respublikanın ümumtəhsil müəssisələrində ümumilikdə 1 milyon 707 min 553 şagird təhsil alır.

tehsil.media xəbər verir ki, bu barədə Elm Təhsil Nazirliyindən bildirilib.

Ümumtəhsil məktəblərinin I sinfində 150 min 289 şagird oxuyur. Ümumtəhsil müəssisələrinin məktəbəhazırlıq qrupları 90 min 26 uşağı əhatə edir. Hazırda respublikada 4431 ümumtəhsil müəssisəsi var və onlardan 388-i Bakı şəhərində fəaliyyət göstərir. Bu təhsil müəssisələrinin 298-i ibtidai, 773-ü ümumi orta, 3340-ı tam orta məktəb, 15-i xüsusi məktəb və xüsusi internat məktəbi, 5-i isə axşam məktəbidir. Həmçinin 64-ü məktəb-lisey, 58-i lisey, 14-ü gimnaziya, 14-ü İnteqrasiya təlimli internat tipli gimnaziya və 1-i inteqrasiya təlimli internat məktəbidir.

2017-ci ildə Avropa İttifaqının Azərbaycan Nümayəndəliyi və UNICEF Azərbaycanın maliyyəsi ilə ölkənin 10 şəhər və rayonunda 50 ümumtəhsil məktəblərinin nəzdində fəaliyyət göstərən icma əsaslı məktəbəqədər təhsil qrupu olaraq fəaliyyətə başlayıb. Uğurlu nəticələr göstərən layihə Heydər Əliyev Fondunun maliyyə dəstəyi sayəsində daha da genişlənib və hazırda 55 şəhər və rayonda fəaliyyət göstərən 850 icma əsaslı məktəbəqədər təhsil qrupunu əhatə edir. Layihə 3-5 yaşlı uşaqların dörd inkişaf sahəsini əhatə edən bacarıqların artırılması, icma əsaslı məktəbəqədər təhsil mərkəzlərinin, valideyn birliklərinin yaradılması və məktəblə birgə əməkdaşlıq nəticəsində ibtidai təhsilin keyfiyyətini artırmaqdan ibarətdir. Həmçinin layihə, məktəbəqədər və ibtidai təhsil səviyyələrində vətəndaş iştirakını təmin etməklə, Azərbaycanın əlverişsiz kənd icmalarında daha keyfiyyətli təhsil xidmətlərinə nail olmaq məqsədini daşıyır.

Bunlarla yanaşı, Birinci vitse-prezident Mehriban Əliyevanın təşəbbüsü və Elm və Təhsil Nazirliyinin Təhsil İnstitutunun dəstəyi ilə “STEAM Azerbaijan” layihəsi 2019-2020-ci tədris ilindən start götürüb. Layihə 6-ci siniflərdən başlayaraq STEAM tətbiq olunan məktəblərdə tədris olunur. Son 3 ildə 100 mindən çox şagirdi, yüzlərlə məktəbi əhatə edən layihənin STEAM İnnovasiya Mərkəzi bu il istifadəyə verilib. “STEAM Azərbaycan Festivalı 2022”də 43 komanda I, 102 komanda II, 108 komanda isə III yerə layiq görülüb.

Elm və Təhsil Nazirliyi Alqoritmika beynəlxalq proqramlaşdırma məktəbi ilə əməkdaşlıq çərçivəsində 2017-ci ildən etibarən ölkədə “Rəqəmsal bacarıqlar” layihəsini tətbiq edir. Layihənin məqsədi təhsilalanların İKT bacarıqlarına dərindən yiyələnməsi, onların informasiya məkanında sərbəst və məqsədyönlü fəaliyyətinə nail olunması, rəqabətqabiliyyətli, məntiqi və qeyri-standart düşüncə tərzinə malik şəxslər kimi formalaşmasını təmin etməkdir. Layihə II-IX siniflər üzrə Azərbaycan və rus bölmələrinin şagirdlərini əhatə edir.

Ölkədə 143 məktəbdənkənar təhsil müəssisəsi var. Məktəbdənkənar təhsil uşaq, yeniyetmə və gənclərin maraq, meyil və bacarıqlarının, intellektual səviyyələrinin, yaradıcı qabiliyyətlərinin inkişafı, fiziki imkanlarının artırılmasını təmin edən təhsil növüdür. 8773 qrup üzrə 113 931 uşaq məktəbdənkənar təhsilə cəlb edilib.

2023-2024-cü tədris ilindən 114 yeni məktəbdə peşə təmayüllü siniflərin təşkili nəzərdə tutulur. Bununla da peşə təmayüllü siniflərin sayı 230-a çatmaqla ümumilikdə 194 məktəbdə 3500-dən çox şagirdi əhatə edəcək. X-XI siniflər üçün nəzərdə tutulan peşə təmayüllü siniflərin yaradılmasında məqsəd şagirdlərin müxtəlif peşə ixtisasları üzrə ilkin bilik və bacarıqlara yiyələnməsinə şərait yaratmaqdır. Şagirdlərə sahibkarlıq bacarıqları aşılamaq və əmək bazarının tələblərinə uyğun kadrların yetişdirilməsi də layihənin məqsədlərindəndir.