Bu universitetdə imtahanlarda süni intellekt tətbiq olunacaq
Azərbaycan Texnologiya Universitetində hazırkı imtahan sessiyasından başlayaraq imtahan prosesində süni intellekt əsaslı innovativ həllər tətbiq ediləcək.
Aztəhsil.az xəbər verir ki, bu platforma 2 əsas modul üzrə fəaliyyət göstərir:
Yazılı imtahan modulu pilot layihə olaraq Rəqəmsal texnologiyalar fakültəsinin I kurs tələbələri üçün tətbiq olunur və bu mərhələdə imtahan prosesi auditoriyada rəqəmsal platforma üzərindən aparılacaq. Platforma vasitəsilə bilet əsaslı imtahan cavabların süni intellekt tərəfindən operativ qiymətləndirilməsi və nəticələrin dərhal təqdim olunması nəzərdə tutulur.
Test imtahanı modulu bütün fakültələrin tələbələri üçün əlçatan olan modul onlara istənilən vaxt və istənilən sayda özlərini onlayn sınamaq imkanı verir.
Bu innovativ platforma ATU-nun rəqəmsal transformasiya və innovasiya strategiyası çərçivəsində təhsil prosesində müasir texnoloji həllərin tətbiqinə və imtahan sistemində rəqəmsallaşma istiqamətində keçidin təmin olunmasına xidmət edir.
