Məktəblərdə son günlərdə xoşagəlməz münasibət yaranıb...

İdrak liseyində baş verən insidentdən sonra bir sıra məktəblərdə yaranan mənzərə ciddi narahatlıq doğurur. Hadisənin təsiri ilə sanki bütün məktəblər potensial problem məkanı kimi qəbul edilməyə başlayıb. Elə hallar var ki, valideynləri az qala uşağı məktəbə buraxmaq istəmirlər, bəziləri isə məktəb qapısında elə aqressiv və təzyiq dolu rəftar edir ki, müəllim və əməkdaşlar özlərini təhlükəsiz yox, “isti kürsüdə” oturmuş kimi hiss edirlər. Bu, nə sağlamdır, nə də qəbulolunandır.

Tehsilmedia.az qeyd edir ki, bəli, baş verən hadisə xoş deyil və diqqətdən kənarda qala bilməz. Amma bir məktəbdə yaşanan insidentə görə bütün təhsil müəssisələrində gərginlik yaratmaq, hər məktəbi risk zonası kimi göstərmək doğru yanaşma deyil. Təhsil mühiti qorxu, təzyiq və əsəb üzərində yox, etibar və əməkdaşlıq üzərində qurulmalıdır. Əks halda zərər görən ilk növbədə uşaqlar olur.

Xüsusilə vurğulanmalıdır ki, məktəb qapısında zorakılıq dili, hədə-qorxu, vulqar ifadələr nə valideynə yaraşır, nə məktəb əməkdaşına, nə də ümumilikdə təhsil adına. Heç kimin buna haqqı yoxdur. Məktəb — mübahisə meydanı deyil, tərbiyə və mədəniyyət məkanıdır. Orada səslənən hər söz, göstərilən hər davranış uşaqlar üçün nümunədir.

Bu baxımdan direktorların məsuliyyəti xüsusilə böyükdür. Direktor müavinlərinə, təsərrüfat müdirlərinə, mühafizə və xadimlərə aydın və sərt tapşırıqlar verilməlidir ki, məktəbin girişində və ərazisində təzyiqə, aqressiyaya, təhqiramiz davranışlara yol verilməsin. Nə müəllim, nə şagird, nə də valideyn məktəb qapısından keçərkən özünü alçaldılmış və ya qorxudulmuş hiss etməməlidir.

Bir insidentin kölgəsində bütün məktəbləri gərginlik atmosferinə salmaq çıxış yolu deyil. Əksinə, belə məqamlarda soyuqqanlılıq, peşəkarlıq və məsuliyyət daha da ön plana çıxmalıdır. Məktəblər təhlükə yox, güvən yeri olmalıdır. Əgər bu sərhəd aşılırsa, bu artıq tərbiyə problemi yox, idarəetmə problemidir.