Valideyn iclasları davam edir...

Dağlıq Şirvan Regional Təhsil İdarəsi üzrə növbəti dəfə Şamaxı rayonunda məktəb-ailə əməkdaşlığının gücləndirilməsi məqsədilə "Rəqəmsal təhlükəsizlik və onlayn mühitdə uşaqların qorunması", "Tədris prosesində sosial psixoloji və emosional mühitin rolu", "Tam orta təhsil səviyyəsində fərdi xüsusiyyətlərə əsaslanan inkişafyönümlü tədrisin yaradılması", "Valideynlərin övladlarının təlim-tərbiyə göstəriciləri ilə davamlı tanışlığının təmini" mövzularında valideyn konfransı keçirilib.

Konfransda Dağlıq Şirvan Regional Təhsil İdarəsinin məsləhətçisi İsa Səlimov, Şamaxı Rayon Təhsil Sektorunun müdiri Məsud Babayev, Şamaxı Rayon İcra Hakimiyyəti başçısının Şamaxı şəhəri üzrə nümayəndəsi Asif Şirəliyev, Şamaxı Rayon İcra Hakimiyyətinin əməkdaşı, “Uşaq hüquqlarının müdafiəsi üzrə komissiya”nın məsul katibi Yasin Fərhadov, Şamaxı Rayon Polis Şöbəsinin “Yetkinlik yaşına çatmayanlarla işin təşkili” qrupunun inspektoru, polis kapitanı Rəşad Mahmudov, Şamaxı Rayon Gənclər və İdman sektorunun müdiri Şahmar Hüseynov, Sosial Xidmətlər Agentiyinin Dağlıq Şirvan regional filialının direktor müavini Xətai Mirzəyev, Şamaxı Rayon Təhsil Sektorunun əməkdaşları, məktəb direktorları, müəllimlər və valideynlər iştirak etmişdir.

Konfrans zamanı qeyd edilən mövzularda müzakirələr aparılıb, valideynlərin sualları cavablandırılıb, mövzular üzrə tövsiyələr verilmişdir.

Qeyd edək ki, bu formada keçirilən konfransların əsas məqsədi məktəb və ailə arasında əlaqələrin gücləndirilməsi, valideyn iştirakçılığının təşviqi və uşaqların hərtərəfli inkişafına dəstək olmaqdır.

Konfranslar region üzrə digər rayonlarda da davam etdiriləcək.