"Zəngi" liseyinin onun adını daşıması məsələsinə baxılmalıdır..." - ANIM

Yaşasaydı bu maarif fədaisinin 70 yaşı olacaqdı. Təhsil ictimaiyyəti, onun rəhbərlik etdiyi “Zəngi” liseyinin məzunları, müəllimləri, şagirdlər və valideynlər, onu tanıyanlar təhsildə onun yoxluğuna təəssüflənirlər. Bayram Heydərov təhsilə və elmə zehni və ürəyi ilə bağlı insan idi. Onun keçdiyi həyat yolunda biz elmlə təhsilin qoşalaşaraq yeni üfüqlər açdığının şahidi olmuşuq..." "DİA-AZ " xəbər verir ki, bunu özünün sosial şəbəkə hesabında keçmiş deputat Etibar Əliyev qeyd edib.
O daha sonra bildirir: "Onun dövründə “Zəngi” liseyində təhsilin keyfiyyəti ilbəil yüksəlirdi. Bu, Bayram müəllimin Orta təhsil sahəsində bitib-tükənməyən idealarının hesabına baş verirdi. O, kənardan çətin görünən məsələləri peşəkar elmi-pedaqoji ustalıqla həll edirdi. 1992-ci ildə Orta məktəb yaratmağın nə qədər çətin olduğunu bilirdik. Lakin Bayram Heydərov bu ideyasının gerçəkləşməsü üçün gecə - gündüz çalışdı və buna nail oldu. Sübut etdi ki, müəllif məktəbi bir çox parametrlərinə görə önə çıxa bilər. Yaratdığı nümunəvi məktəbi göz bəbəyi kimi qorudu. Minlərlə valideynin, şagirdin dostu oldu. Onların uğurlarına övladlarının uğurları qədər sevinirdi.
Bayram Heydərov məmləkətin savadlı riyaziyyatçılarından biri idi. Dünyaca məşhur Novosibirsk Riyaziyyat məktəbində alimlik dərəcəsi almışdı.
Elmlə təhsilin vəhdətini belə şəxsiyyətlər yarada bilərdilər. Dünyasını dəyişəndən sonra liseylə heç bir əlaqəsi olmayan birisinin direktor təyinatı liseyi zəiflətdi, valideynlər uşaqlarını bu adlı -sanlı təhsil müəssisəsindən çıxarmağa başladılar.
Allah sənə rəhmət eləsin böyük pedaqoq-alim, böyük dost, xeyirxah insan, ədalətli rəhbər…
"Zəngi" liseyinin onun adını daşıması məsələsinə baxılmalıdır. Müvafiq orqanlar belə bir addım atmaqla alim- pedaqoqun xatirəsini əbədiləşdirə bilər..."