ABŞ-ın Los-Anceles şəhərində yerləşən Cənubi Kaliforniya Universitetinin (USC) rəhbərliyi “Azərbaycan Diaspor Gəncləri” (ADY) təşkilatı üzvlərinin minnətdarlıq məktublarını cavablandırıb.

tehsil.media Diasporla İş üzrə Dövlət Komitəsinə istinadən xəbər verir ki, cavab məktubunda bildirilib:

“USC Annenberg Kommunikasiya və Jurnalistika Məktəbinin Diplomatiya Magistri Forumu ilə bağlı narahatlıqlarınızı bölüşməyə vaxt ayırdığınız üçün təşəkkür edirik.

Biz 29 sentyabr hadisələrinin bu qədər çoxlu insan üçün nə qədər çətin və ağrılı olduğunu başa düşürük.

Universitet həm hadisəyə hazırlığın, həm də onun daxilində və ətrafında baş verən hər məqamı nəzərdən keçirir. Yoxlama başa çatdıqdan sonra biz bu problemləri gələcəkdə daha yaxşı həll etmək üçün proseslərin tətbiq edilməsini və USC-nin tərkibinə daxil olan bütün icmaların dəstəklənməsinin təmin olunmasını öhdəmizə götürürük”.

Xatırladaq ki, ADG üzvləri Los-Anceles şəhərində erməni radikal qruplaşmalarının cinayət əməlləri törətmələrinə baxmayaraq, “Türkiyənin ictimai diplomatiyası” mövzusunda konfransın davam etdirilməsinə görə Cənubi Kaliforniya Universitetinin 12-ci prezidenti Kerol Linn Folta minnətdarlıq məktubları ünvanlayıblar. Universitet rəhbərliyinin bu qətiyyətli addımı ifadə azadlığı, beynəlxalq hüquq, müxtəliflik və dinc fikir mübadiləsi hüququnun aydın mesajı kimi qiymətləndirilib.