Bəzi valideynlər uşaqlarını həddindən artıq ərköyün böyüdür

“Bu gün təhsildə ciddi çağırışlar var və müxtəlif transformasiyaların şahidi oluruq. Süni intellekt sürətlə həyatımıza daxil olur, dünyada da təhsilə baxışlar dəyişir. Bunlar bizdən də təhsildə yeni yanaşmaları tələb edir”.

AzEdu.az xəbər verir ki, bu fikirləri millət vəkili Ceyhun Məmmədov “Məktəbəqədər təhsilin inkişafı və transformasiyası” mövzusunda keçirilən beynəlxalq forumda səsləndirib.

Millət vəkili son günlərdə dünyada və Türkiyədə məktəblərdə baş verən xoşgəlməz hadisələrdən bəhs edərək bildirib ki, bizim yeniyetmələr də zaman-zaman müxtəkif təsirlərə məruz qalırlar: “Bu kimi vəziyyətlərdə üzərində durmalı olduğumuz məsələlərdən biri də valideynlərlə və onların təhsil prosesində iştirakı ilə bağlıdır. Burada bir neçə istiqamətdə işlər getməlidir. Universitetlər öz işini görür, mütəxəssis yetişdirir, amma valideynin bu prosesə nə qədər hazır olduğunu bilmirik”.

Millət vəkili qeyd edib ki, bu prosesdə təhsil müəssisələri və müəllimlərin işi olduqca çətindir: “Bəzi valideynlər övladlarını həddindən artıq ərköyün böyüdürlər, onlar övladlarının bütün istəklərini yerinə yetirməyə çalışırlar. Bu gün tədris prosesində artıq cəza üsulu effekt vermir. Bir sıra hallarda müəllim uşağı tərbiyə etməyə çalışır, lakin valideyn buna mane olur”.

C.Məmmədov qeyd edib ki, gələcəyimiz bilavasitə təhsildən asılıdır.

(Azərbaycan müəllimi)