Məktəbdə geyim mübahisəsi...

Məktəblərdə geyim məsələsi bəzən açıq danışılmadığı üçün anlaşılmazlıqlara səbəb olur. Halbuki problem çox konkret və gündəlik situasiyalarla bağlıdır. Məsələn, bəzi qız şagirdlər qısa ətək geyindikdə, pilləkənlə qalxıb-düşərkən istəmədən alt geyimləri görünə bilir. Bu isə həm onların özləri üçün narahat vəziyyət yaradır, həm də ətrafda olan bəzi oğlanların qeyri-etik baxışlarına səbəb olur. Bu, nə normal haldır, nə də görməzdən gəlinməlidir.

Eyni zamanda məsələ təkcə qızların geyimi ilə bitmir. Bəzi oğlan şagirdlərin də həddindən artıq dar və ya diqqət çəkən geyimlər seçməsi məktəb mühitinə uyğun sayılmır. Məktəb dəb nümayişi yeri deyil; burası təhsil və tərbiyə məkanıdır. Ona görə də həm qızlar, həm də oğlanlar geyim seçimində müəyyən hədləri gözləməlidirlər.

Təhsilmedia.info bildirir ki, belə hallarda müəllimin irad bildirməsi tam normaldır. Bu, kimisə alçaltmaq və ya “etiketsiz” damğası vurmaq üçün deyil, yaranan real vəziyyətin qarşısını almaq üçündür. Müəllim görür ki, konkret bir geyim forması şagirdi narahat vəziyyətə sala bilər və ya məktəbdə xoşagəlməz davranışlara səbəb olur – bu zaman müdaxilə etməsi onun vəzifəsidir.

Digər tərəfdən, oğlanların davranışı da mütləq şəkildə tənqid olunmalı və onlara sərhədlər izah edilməlidir. Baxmaq, izləmək, kimisə narahat edəcək şəkildə diqqət yetirmək etik deyil və buna göz yumulmamalıdır. Bu, tərbiyə məsələsidir və məktəbdə açıq şəkildə müzakirə olunmalıdır.
Valideynlərin belə məsələlərdə emosional reaksiya verməsi problemi həll etmir. Əksinə, müəllimlə əməkdaşlıq edib vəziyyəti düzgün anlamaq daha faydalıdır. Məqsəd kimisə günahlandırmaq deyil, uşaqlar üçün daha sağlam və təhlükəsiz mühit yaratmaqdır.

Məktəbdə hər kəs – istər qız, istər oğlan – geyimi və davranışı ilə həm özünə, həm də ətrafdakılara hörmət etməlidir. Bu balans qorunduqda nə belə problemlər yaranar, nə də gərginlik.