Azərbaycanda beşyaşlıların sosial-emosional bacarıqları QİYMƏTLƏNDİRİLİB
IELS 2025 tədqiqatı əsasında Azərbaycanda beşyaşlı uşaqların sosial-emosional bacarıqları üzrə nəticələr açıqlanıb.
Aztəhsil.az xəbər verir ki, bunu Təhsil İnstitutunun direktoru səlahiyyətlərini müvəqqəti icra edən Elnur Əliyev Beynəlxalq Erkən Öyrənmə və Uşaq Rifahı Tədqiqatının (IELS 2025) nəticələrinə dair ekspertlər və media nümayəndələri üçün təşkil edilən məlumatlandırma sessiyasında çıxışı zamanı deyib.
O qeyd edib ki, tədqiqatın nəticələrinə görə, Bakı və Sumqayıt üzrə Azərbaycan inhibisiya (özünü tənzimləmə) bacarığı üzrə 501,97 bal toplayaraq orta göstəricini (499,35) üstələyib. Zehni çeviklik üzrə göstərici 500,17 bal ilə orta səviyyəyə yaxın olub (500,57). İşlək yaddaş üzrə isə 489,34 bal nəticə qeydə alınıb ki, bu da orta göstəricidən (500,65) aşağıdır.
Müqayisədə Koreya bütün istiqamətlər üzrə lider mövqedə qərarlaşıb (inhibisiya – 577,00; işlək yaddaş – 567,54; zehni çeviklik – 546,36). İngiltərə və Flamand icması da yüksək nəticələr göstərən ölkələr sırasındadır. Azərbaycan bu sahədə Braziliyanın bəzi regionlarını (453,55; 467,91; 472,56) qabaqlasa da, bir sıra inkişaf etmiş ölkələrdən geri qalır.
Elnur Əliyev qeyd edib ki, sosial və emosional inkişaf göstəricilərinə gəldikdə, Azərbaycan emosiyaların tanınması üzrə 500,58 bal, emosiyanın səbəbinin müəyyən edilməsi üzrə 493,49 bal nəticə göstərib. Güvən göstəricisi 500,37 bal təşkil edib.
Sosial yönümlü müsbət davranış üzrə Azərbaycan 510,97 bal ilə diqqətçəkən nəticə nümayiş etdirib. Pozucu olmayan davranış üzrə isə göstərici 501,13 bal olub.
Bu sahədə İngiltərə (xüsusilə pozucu olmayan davranış üzrə 530,27 bal) və Koreya (522,54 bal) yüksək nəticələrlə seçilir.
Qeyd edək ki, IELS 2025 tədqiqatı uşaqların erkən yaşlarda idrak, icraedici funksiyalar və sosial-emosional bacarıqlarının səviyyəsini ölçməklə yanaşı, ölkələr arasında müqayisəli təhlil aparmağa imkan yaradır.
