Kəlbəcər rayonu 18 nömrəli tam orta ümumtəhsil məktəbinin respublika fənn müsabiqəsinə hazırlaşan şagirdləri əlavə dərs vəsaitləri ilə təmin olunub.

AzEdu.az xəbər verir ki, layihə çərçivəsində fizika, riyaziyyat və biologiya fənlərinin hər birindən 4 nəfər şagirdin fənn müsabiqəsinə hazırlığı nəzərdə tutulsa da, şagirdlərin müraciətləri nəzərə alınaraq riyaziyyat fənni üzrə 8, fizika fənni üzrə 4, bologiya fənni üzrə 3 və təbiət fənni üzrə 6 nəfər olmaqla, ümumilikdə, 21 nəfər şagird dərsdənkənar məşğələlərə cəlb olunub. Hazırda dərsdənkənar məşğələlər hər fənn üzrə həftədə 2 dəfə olmaqla keçirilir.

Layihənin növbəti mərhələsində şagirdlərin Lütfi Zadə adına riyaziyyat-məntiq olimpiadasında, riyaziyyat, fizika, biologiya və təbiət fənnindən respublika fənn müsabiqəsində iştirakı təmin ediləcək.

Xatırladak ki, Elm və Təhsil Nazirliyinin Təhsildə inkişaf və innovasiyalar üzrə IX qrant müsabiqəsi çərçivəsində Kəlbəcər rayonu 18 nömrəli tam orta ümumtəhsil məktəbində icra olunan “İstedadlı şagirdlərin respublika fənn müsabiqəsinə hazırlığının təşkili” layihəsi çərçivəsində fizika, riyaziyyat, biologiya və təbiət fənləri üzrə təşkil olunub. Layihənin məqsədi aztəminatlı ailələrdən olan istedadlı şagirdlərin respublika fənn müsabiqəsinə hazırlığını təşkil etməkdir.