​Son illərdə müəllim adı ətrafında o qədər neqativ rəylər, rüşvət iddiaları və ittihamlar dolaşır ki, artıq vicdanlı müəllimlərimiz "tikan üstündə" gəzirlər. Elə bir mühit yaranıb ki, sanki hər bir addımda günahkar elan olunacaqlarını gözləyirlər. Təəssüf ki, bəzi hallarda "qurunun oduna yaş da yanır" – öz cibindən, canından şagirdi üçün nələrsə edən fədakar müəllimləri də eyni tərəziyə qoyub alçaldırlar.

​Xüsusən 5 oktyabr və ya 8 mart kimi özəl günlər yaxınlaşanda hər tərəfdən bir fəryad qopur: "Rüşvət baş alıb gedir!" Amma kimsə dərindən düşünmür ki, övladımızın əziyyətini çəkən, ona həm ana, həm ata, həm də yol göstərən bir insanı sevindirmək niyə bu qədər böyük problemə çevrilməlidir? Heç kim valideyni məcbur etmir. Çox vaxt elə valideynlərin özləri "bəhsə-bəhs" prinsipi ilə hərəkət edir, sonra isə öz etdiklərinin günahını müəllimin üzərinə yıxırlar.
​Qarşıdan 8 Mart gəlir. Bütün qadınların sevinməli olduğu bu gözəl gündə, qadın müəllimlərimiz iki od arasında qalıblar. Onlar bayrama sevinə bilmirlər, çünki adlarının "pul yığan" siyahısında hallanmasından qorxurlar.

​Gəlin, necə deyərlər "malı-mala qatmayaq" . Bəli, biz də bilirik ki, şagird yanına gəlməyəndə ona zorakılıq edən, dərs keçməyən, hər dəqiqə "fond pulu", "test pulu", "xadimə pulu" deyib valideyni bezdirən, xüsusi hədiyyə sifariş etdirən, dərsi ancaq yola verən və s. peşəsini ticarətə çevirənlər var. Əgər bir müəllim sizi həqiqətən incidirsə, tələbləri ilə boğursa, haqlısınız. Amma bu qara ləkəni bütün müəllim ordusuna şamil etmək ədalətsizlikdir.

​Bir müəllim ki, övladınıza hərfləri öyrədir, onun dünyagörüşünü formalaşdırırsa, bir-iki nəfərin səhvinə görə onun adını ləkələmək olmaz. Danışmaq xatirinə danışıb, müəllimi uşaqların yanında kiçiltmək bizə heç nə qazandırmır. Əksinə, biz övladlarımıza böyüyə hörməti, əziyyəti dəyərləndirməyi və vəfanı öyrətməliyik.

​Həzrəti Əli (ə) nə gözəl deyib: "Mənə bir hərf öyrədənin qulu olaram." Bu, müəllim əməyinə verilən ən ali qiymətdir. Gəlin, bu müqəddəs peşə sahiblərini ucuzlaşdırmayaq, onları cəmiyyətin gözündən salmayaq. Müəllim ucaldıqca, gələcəyimiz də ucalacaq.



Metodika üzrə mütəxəssis, təlimçi-pedaqoq Məmmədova Sevinc