ADNSU əməkdaşlıq əlaqələrini gücləndirir
ADNSU əməkdaşlıq əlaqələrini gücləndirir
Azərbaycan Dövlət Neft və Sənaye Universiteti (ADNSU) iqlim dəyişikliyi ilə bağlı beynəlxalq təşəbbüslər çərçivəsində Oksford Universitetinin Said Biznes Məktəbi ilə əməkdaşlıq elan edir. Əməkdaşlıq “Oxford Said Qlobal İqlim Texnologiyaları Müsabiqəsi 2026” layihəsi çərçivəsində həyata keçirilir.
AzEdu.az xəbər verir ki, “Oxford Said Qlobal İqlim Texnologiyaları Müsabiqəsi 2026” layihəsi gənc innovatorları və müəllimləri aktual ekoloji problemlərə texnologiyaya əsaslanan həllər və müasir dərs planları hazırlamağa təşviq edən nüfuzlu beynəlxalq platformadır. Layihə iqlim dəyişikliklərinin təsirlərinə qarşı mübarizədə təhsilin və innovasiyanın rolunu gücləndirməyi hədəfləyir.
Əməkdaşlığın əsas məqsədi 15-18 yaşlı orta məktəb şagirdlərini və müəllimləri qlobal iqlim çağırışlarına praktik və miqyaslana bilən həllər hazırlamağa cəlb etməkdir. Təşəbbüs çərçivəsində iştirakçılar yalnız texnoloji ideyalar irəli sürməyəcək, eyni zamanda bu mövzuların tədris prosesinə inteqrasiyası üçün effektiv dərs planları da hazırlayacaqlar. Bu yanaşma şagirdlərdə yaradıcılığın, tənqidi düşüncənin və fənlərarası əməkdaşlığın inkişafına xidmət edir.
Qeyd edək ki, 2025-ci ildə keçirilən müsabiqə 75 ölkədən 1 600-dən çox müraciət qəbul edərək geniş beynəlxalq maraq doğurub. Təşkilatçılar bildirirlər ki, 2026-cı il buraxılışı müsabiqənin coğrafiyasını daha da genişləndirməyi və daha çox ölkədən iştirakçı cəlb etməyi qarşıya məqsəd qoyur.
Müsabiqənin final mərhələsi 2026-cı ilin avqust ayında Oksfordda keçiriləcək. Finalçı şagird komandaları və müəllimlər Said Business Schoolda öz həllərini və dərs planlarını təqdim etmək imkanı əldə edəcəklər. Qalib şagird komandası 2027-ci ildə Oksfordda təşkil olunacaq “Future Climate Tech Innovators Summer School” proqramında iştirak üçün tam təqaüd qazanacaq. Qalib müəllim isə Said Business Schoolun əyani Executive Education proqramında iştirak etmək imkanı əldə edəcək. Finalçıların və qaliblərin bütün səfər və iştirak xərcləri təşkilatçılar tərəfindən qarşılanacaq.
Müsabiqə çərçivəsində iştirakçılar hava çirklənməsi, ekstremal hava hadisələri, ərzaq təhlükəsizliyi, biomüxtəlifliyin itirilməsi və su qıtlığı kimi qlobal problemlər üzrə həllər hazırlayacaqlar. Layihədə texnologiyanın ətraf mühit dəyişikliklərinin monitorinqi, iqlim risklərinə uyğunlaşma və müxtəlif səviyyələrdə innovativ yanaşmaların tətbiqi baxımından xüsusi əhəmiyyət kəsb edir. Təşəbbüsün əsas məqsədi daha təmiz, təhlükəsiz və dayanıqlı gələcəyin formalaşdırılmasına töhfə verəcək yeni nəsil liderlərin yetişdirilməsidir.
Müraciət detalları və iştirak qaydaları ilə yarışmanın rəsmi internet saytında tanış olmaq mümkündür:
//www.sbs.ox.ac.uk/climate-change-challenge/oxford-said-global-climate-tech-challenge-2026
