BMU-nun tələbəsi İtaliyanın nüfuzlu universitetindən qəbul alıb
Bakı Mühəndislik Universitetinin (BMU) “Kimya mühəndisliyi” ixtisasının IV kurs tələbəsi Məhəmmədəli Ayralov İtaliyanın Milan Politexnik Universitetindən qəbul alıb.
Universitetdən AzEdu.az-a bildirilib ki, o, magistratura təhsilini Avropanın bu nüfuzlu universitetində eyni ixtisas üzrə davam etdirmək niyyətindədir.
Milan Politexnik Universiteti QS World University Rankings reytinqinə əsasən, dünya universitetləri arasında ilk 100-lükdə (98-ci yer) qərarlaşan və mühəndislik sahələri üzrə qlobal miqyasda aparıcı ali təhsil müəssisələrindən biridir. M.Ayralovun bu uğuru bakalavr təhsilini hələ tamamlamadan əldə etməsi onun yüksək akademik potensialının və BMU-da formalaşdırılan keyfiyyətli tədris mühitinin, verilən təhsilin beynəlxalq səviyyədə rəqabətqabiliyyətli olduğunun göstəricisidir.
Ağstafa rayonu, Dağ Kəsəmən kəndində anadan olan, Qazax şəhəri S.Vurğun adına 2 saylı tam orta məktəbdə təhsil alan M.Ayralov məktəb illərində yerli və beynəlxalq olimpiadalarda qazandığı uğurları ilə fərqlənib. BMU-ya 592 balla qəbul olan Məhəmmədəli Ayralov II kursda Turin Politexnik Universitetində “Erasmus” mübadilə proqramı ilə təhsil alıb. Həmin müddətdə universitetdə könüllü şəkildə tədqiqat köməkçisi kimi fəaliyyət göstərib və startap komandaları ilə işləyib. Azərbaycana qayıtdıqdan sonra BMU-da təhsilinə davam etməklə yanaşı, müəllim köməkçisi və mentor kimi fəaliyyət göstərib. Kimya, kimya mühəndisliyi, korroziya mühəndisliyi, polimer prosesləri mühəndisliyi və Aspen HYSYS üzrə tədris və mentorluq edib. Bir neçə yerli, həmçinin beynəlxalq nüfuzlu hakatonlara qatılıb və investisiyalar qazanıb. Bundan əlavə, fərqli ölkələrdə sahibkarlıq mövzularında təlimlərə qatılıb (Lüksemburq, Estoniya, Hollandiya) və PV Panellər üçün Materialın Modelləşdirilməsi və Dizaynı (Material Modelling and Design for PV Panels) mövzusunda təlimçi kimi çıxış edib (Danimarka, Almaniya, İtaliya, İsveç).
I kursda oxuyarkən enerji transferi mövzusunda ilk tezisi çap olunub, II kursdan etibarən könüllü şəkildə laboratoriyada assistentlik etməyə başlayıb. Ümumilikdə, 6 tezis və 2 elmi məqalənin müəllifi və həmmüəllifidir. 3 tezisi Azərbaycanda, 1 tezisi Türkiyədə, 1 tezisi Çində, 1 tezisi isə İtaliyada keçirilən konfranslarda təqdim olunub və çap edilib. Ən son həmmüəllif olduğu məqalə yüksək indeksli Q1- “Molecular Liquids” jurnalında dərc olunub.
M.Ayralovun əsas məqsədi elmi araşdırmalar aparmaq, nüfuzlu universitetlərin birində PhD təhsilini tamamlamaq və materiallar elmi sahəsində alim olmaqdır. O, fevral ayından etibarən dünyanın nüfuzlu testing şirkətlərindən biri olan SGS şirkətində kimyaçı-təcrübəçi kimi fəaliyyətə başlayacaq.
