Ege Universitetində Ulu Öndər Heydər Əliyevin anadan olmasının 100-cü ildönümü qeyd edilib - FOTOLAR
9 Noyabr - Bayraq Günündə Azərbaycanın Türkiyədəki səfirliyinin, UNEC-in və Türkiyənin Ege Universtetinin təşkilatçılığı Türkiyə Cümhuriyyətinin yaranmasının və Ulu Öndər Heydər Əliyevin anadan olmasının 100 illik yubileyi münasibətilə Ege Universitetində tədbir keçirilib.
Universitetdən "tehsilmedia.info" a verilən məlumata görə, tədbir Heydər Əliyevin həyat yoluna və Cümhuriyyətin 100 illik yubileyinə həsr edilmiş videoçarxın nümayişi ilə başlayıb.
Tədbirdə Ege Universitetinin rektoru professor Necdet Budak, Azərbaycan Respublikasının Türkiyədəki səfiri Rəşad Məmmədov, UNEC-in prorektoru dosent Gəray Musayev, hər iki universitetinin nümayəndələri, akademik heyəti, Ege Universitetində təhsil alan azərbaycanlı tələbələr, eləcə də digər qonaqlar iştirak ediblər.
Ege Universitetinin rektoru prof. Necdet Budak Türkiyə Cümhuriyyətinin yaranmasının və Ümummilli Lider Heydər Əliyevin anadan olmasının 100-cü ildönümünün rəhbərlik etdiyi universitetdə qeyd olunmasından qürur duyduğunu bildirib. 1991-ci ildə müstəqillyini elan edən Azərbaycanı ilk tanıyan dövlətin Türkiyə Cümhuriyyəti olduğunu deyən rektor, “Bir millət, iki dövlət” devizi altında hər iki ölkə arasında əməkdaşlığın bu gün bütün sahələrdə uğurla inkişaf etdiyini qeyd edib.
Prof. Necdet Budak Ege Universiteti barədə məlumat verərək, burada 1106 azərbaycanlı tələbənin təhsil aldığını diqqətə çatdırıb. UNEC ilə Ege Universiteti arasında “Qida mühəndisliyi” ixtisası üzrə ikili diplom proqramının həyata keçirilməsindən məmnunluğunu ifadə edib.
Azərbaycan Respublikasının Türkiyədəki səfiri Rəşad Məmmədov Türkiyə ilə Azərbaycanın dostluq və qardaşlıq münasibətlərindən, eyni zamanda Ulu Öndər Heydər Əliyevin Türkiyə ilə bağlı xarici siyasətindən danışıb. Səfir ölkə prezidentləri İlham Əliyev və Rəcəb Tayyib Ərdoğanın davam etdirdiyi bu günkü uğurlu siyasətin təməlində məhz Ulu Öndər Heydər Əliyevin ideyalarının dayandığını bildirib.
UNEC-in prorektoru dosent Gəray Musayev Ümummilli Lider Heydər Əliyevin “Bir millət, iki dövlət” şüarının ölkələrimiz arasındakı münasibətləri tarixdə görünməmiş səviyyəyə yüksəltdiyini söyləyib. Türkiyə Prezidenti Rəcəb Tayyib Ərdoğan və Azərbaycan Prezidenti İlham Əliyevin qardaşlıq və səmimiyyətə əsaslanan əməkdaşlığı nəticəsində bu gün çox dəyərli günlərin yaşandığını qeyd edib.
Ege Universiteti ilə əməkdaşlıqdan söz açan G.Musayev, hər iki universitet arasında bu ildən start verilən ikili diplom proqramı çərçivəsində 20 azərbaycanlı və 10 türkiyəli tələbənin təhsilə başladığını bildirib. Əməkdaşlıq çərçivəsində universitetlər arasında digər layihələrin də həyata keçiriləcəyini vurğulayıb.
Sonra Ege Universitetinin Ədəbiyyat Fakültəsinin professoru Həsən Mərt Türkiyə və Azərbaycanın yaranma tarixi, UNEC-in Mühəndislik fakültəsinin dekanı dos. Elçin Səmədov isə Ulu Öndər Heydər Əliyevin həyat yolu və Azərbaycanın müstəqillik uğrunda mübarizəsi barədə təqdimatlarla çıxış ediblər.
Tədbir UNEC Yaradıcılıq Mərkəzinin üzvlərinin və Ege Universitetinin Dövlət Türk Musiqisi Konservatoriyasının hazırladığı “Xəzərdən Egeyə” musiqili konsert proqramı ilə başa çatıb.
