İnklüziv təhsildə çalışan müəllimlər sadəcə dərs demirlər – onlar səbrin, təmkinin və insani dəyərlərin hər gün sınağa çəkildiyi bir mühitdə fəaliyyət göstərirlər. Onlar təkcə öyrətmirlər, həm də yönləndirir, müşahidə edir, psixoloji dayaq olurlar.

Tehsilmedia.az qeyd edir ki, bu müəllimlərin qarşılaşdığı gərginliklər dərsdən kənara da daşır – şəxsi həyatlarında belə aqressiya, yorğunluq və emosional yüklənmə hiss olunur. Buna görə, onların əməyinə xüsusi münasibət, əlavə dəstək və motivasiya vacibdir.

Həmkarlar İttifaqları, məktəb rəhbərlikləri və aidiyyəti qurumlar bu reallığı nəzərə almalı, inklüziv siniflərdə çalışan müəllimlər üçün əlavə imtiyazlar, istirahət və psixoloji dəstək mexanizmləri yaratmalıdırlar.
Çünki əlavə sənədlərlə, hesabatlarla bu müəllimləri yormaq deyil, əksinə, rahatlatmaq və qorumaq lazımdır.

Unutmayaq: İnklüziv təhsil sadəcə uşaqlar üçün deyil, həm də insanlıq üçün sınaqdır.
Və bu sınağın ön cəbhəsində duranlar müəllimlərdir.