Məktəblərdə Telefon Qadağası – Əsl Məqsəd Nədir?

Məktəbəqədər və Ümumi Təhsil üzrə Dövlət Agentliyinin rəhbəri Eşqi Bağırov məktəblərdə şagirdlərin telefon istifadə etməsini qadağan etdiyini açıqlayıb. Rəsmi versiyada bu qərarın şagirdlərin dərs zamanı diqqətinin dağılmaması üçün verildiyi bildirilsə də, cəmiyyətdə fərqli fikirlər səslənir.

Tehsilmedia.az bildirir ki, reallıq isə tamam başqa mənzərə ortaya qoyur:

Məktəblərdə siniflərin idarə olunması bərbad vəziyyətdədir;

Bullinq, zorakılıq, bıçaqlanma, döyülmə kimi xəbərlər hər gün gündəmə gəlir;

Müəllim və rəhbər şəxslərin fəaliyyəti ilə bağlı çoxsaylı şikayətlər var;

Təhsil sahəsində korrupsiya və qeyri-şəffaf idarəçilik iddiaları gündən-günə artır.


Bu baxımdan cəmiyyətin böyük bir hissəsi hesab edir ki, telefon qadağası şagirdlərin maraqları üçün deyil, Agentliyin və rəhbər şəxslərin öz əməllərini gizlətmək, ortaya çıxacaq fakt və sübutların qarşısını almaq məqsədi daşıyır.

Tehsilmedia.az qeyd edir ki, əgər məqsəd doğrudan da şagirdlərin təlim-tərbiyəsinə diqqət yetirmək idisə, onda ilk növbədə:
~Məktəblərdə real problemlərin həlli,
~Zorakılığın və bullinqin qarşısının alınması,
~Müəllim və rəhbərliyin fəaliyyətinə ciddi nəzarət,
~Təhsilalanların təhlükəsizliyi üçün konkret addımlar atılmalı idi.

Cəmiyyət soruşur:
Telefon qadağası ilə hansı problem həll olundu?
Əslində bu qərar kimlərin maraqlarına xidmət edir?

Təhsildə islahat görüntüsü yaratmaqla deyil, həqiqi problemlərə toxunmaqla nəticə əldə etmək mümkündür.