Xırdalan məktəbi ilə bağlı iddialara aydınlıq: əvvəl yayılan məlumatlar təsdiqini tapmadı
Abşeron rayonu, Xırdalan şəhərində yerləşən 4 saylı tam orta məktəblə bağlı daha əvvəl ictimaiyyətə təqdim olunan iddialar BakuNews.az tərəfindən yenidən araşdırılıb.
Aparılan əlavə araşdırma nəticəsində məlum olub ki, ilkin yayılan məlumatların bir qismi təsdiqini tapmayıb və müəyyən məqamlar yanlış təqdim edilib.
Belə ki, araşdırma zamanı müəyyən olunub ki, Abşeron təhsil sektorunun müdiri Sənan Xəlilov tərəfindən məktəbdə aparılan yoxlama formal xarakter daşımayıb, əksinə məsələ yerində və ətraflı şəkildə araşdırılıb.
Təranə Vəliyeva ilə bağlı səsləndirilən iddialara gəldikdə isə, əldə etdiyimiz məlumatlara görə, onun texnikom təhsili mövcuddur və o, məktəbdə Uşaq Birliyi Rəhbəri vəzifəsində fəaliyyət göstərir. Eyni zamanda bildirilib ki, onun daimi olaraq sinif rəhbəri təyin olunması ilə bağlı yayılan məlumatlar həqiqəti əks etdirmir.
Qeyd edilib ki, 5A sinfi ilə bağlı yaranmış vəziyyət müəllimin analıq məzuniyyətində olması ilə əlaqədar olub. Bu səbəbdən dərs prosesinin fasiləsiz davam etməsi üçün Təranə Vəliyevaya müvəqqəti olaraq əvəzləmə qaydasında məsuliyyət həvalə edilib. Bu proses qanunvericiliyə uyğun həyata keçirilib və bununla bağlı əlavə maliyyə vəsaiti ayrılmayıb.
Araşdırma zamanı o da bildirilib ki, Təranə Vəliyeva uzun illərdir məktəbdə fəaliyyət göstərir və qazi anası olaraq kollektiv və valideynlər arasında müsbət reputasiyaya malik pedaqoqlardan biri kimi tanınır.
Eyni zamanda, məktəbdə yaranmış narazılıqların fonunda direktor Zəminə xanım tərəfindən valideyn və müəllim arasında baş vermiş anlaşılmazlığa operativ müdaxilə edildiyi və məsələnin həll olunduğu qeyd edilir.
Beləliklə, aparılan araşdırma nəticəsində əvvəl səsləndirilən iddiaların əhəmiyyətli hissəsinin təsdiqini tapmadığı və məsələnin daha çox yanlış anlaşılma zəminində formalaşdığı qənaətinə gəlinir.
BakuNews.az olaraq bildiririk ki, ictimai maraq doğuran məsələlərdə obyektivliyin qorunması və məlumatların dəqiqləşdirilərək təqdim olunması əsas prinsipimizdir.
