Qəbul imtahanları 1 cəhd olur? – “Abituriyentlər daha ciddi hazırlaşacaq”
Hazırda abituriyent, valideyn və müəllimlərin diqqətində olan məsələlərdən biri Dövlət İmtahan Mərkəzi (DİM) tərəfindən keçirilən ali təhsil müəssisələrinə qəbul imtahanlarıdır.
Müşahidələr əsasında görürük ki, valideynlər tərəfindən ən çox narazılığa səbəb olan nüanslardan biri övladlarının çox oxumasına rəğmən müsbət nəticə göstərə bilməməsidir.
Bu səbəbdən çox zaman imtahan suallarının yanlış və çətin tərtib olunduğuna dair iddialar da ortaya atılır.
Maraqlıdır, bəs sistemli olaraq oxuyan savadlı abituriyentlərin qəbul imatahanlarında aşağı bal toplamasının səbəbləri nədən irəli gəlir?
tehsilmedia.info xəbər verir ki, mövzu ilə bağlı AzEdu.az-a açıqlama verən, təhsil və qəbul məsələləri üzrə ekspert Sevinc Purkeştasib qeyd edib ki, abituriyentlər imtahana gedərkən özlərindən çox əmin olur, hər şeyi bildiklərini zənn edirlər, bu isə yaxşı nəticə vermir:
“Ali təhsil müəssisələrinə qəbul imtahanlarından sonra, insanları ən çox düşündürən suallardan biri də abituriyentlərin bildiklərini yaza bilməməsidir. Ən vacib məsələ odur ki, abituriyentlərin çoxu imtahana gedəndə elə fikirləşir ki, hər şeyi bilir. Özlərindən çox arxayın olurlar və imtahana rahat şəkildə gedirlər. Sullarla tanış olduqdan sonra isə görürlər ki, heç də düşündükləri kimi deyil. Uzun illərdir, müşahidələrim əsasında deyə bilərəm ki, abituriyentlər ali məktəblərə qəbul imtahanın 2-ci cəhdinə daha ciddi hazırlaşırlar.
Birinci şans imtahanında iştirak edən namizəd çətinlikləri və sual tiplərinin necə olduğunu görür. Onlara aydın olur ki, imtahan vermək heç də düşündükləri kimi asan deyil. Bəziləri ona görə yaxşı bildiklərini fikirləşib, az bal toplayırlar. Həmçinin, imtahanların 2 cəhd olması da onlara rahatlıq hissi verir. Bəlkə də sözügedən proses 1 dəfə olsa, abituriyentlər daha ciddi hazırlaşar. Onlar birinci cəhdi sınaq kimi nəzərdə tuturlar. Bu da təbii ki, nəticələrinə təsir göstərir. Özüm də müşahidə etmişəm ki, bir çox abituriyent var idi ki, biz onlardan yüksək nəticə gözləyirdik, lakin həmin abituriyentlər heç də etimadımızı doğrultmadılar”.
Ekspert vurğulayıb ki, DİM-in tərtib etdiyi suallarda heç bir problem yoxdur:
“Hər il bu tərtibat getdikcə təkmilləşir və Avropa təhsil sisteminə uyğunlaşmağa çalışır. Bu, müsbətdir. Düzdür, bu il keçirilən buraxılış imtahanında Azərbaycan dili fənnindən bəzi problemlər yaşandı, amma düşünürəm ki, bu elə də ciddi problem deyildi. Yenə də qeyd edim ki, zəif nəticələr şagirlərin psixoloji vəziyyəti ilə əlaqədardır. Onlar arxayın şəkildə imtahana girir və sonda heç də asan olmadığını görürlər”.
