Artıq iki ildir ki, orta ümumtəhsil müəssisələrində çalışan müəllimlər sertifikasiya imtahanlarına cəlb olunurlar. Prosesi hamı müsbət qarşılasa da, bəzi təhsilverənlər qiymətləndirmədən, nəticəyə görə verilən əməkhaqlarından narazıdırlar.

tehsil.media bildirir ki, imtahanın test mərhələsindən 30 bal toplayanların əməkhaqqısına 10%, yüksək nəticə göstərərək 51 bal və daha artıq toplayanlara 35 % əlavələr tətbiq olunur. 30 və 50 bal arasındakı nəticələr fərqləndirilmədiyindən bunu müəllimlər ədalətli hesab etmirlər. Onların fikrincə, 40 baldan yuxarı toplayanlara fərqli qiymətləndirilmə aparılmalıdır.

Bunun, təhsil eksperti Kamran Əsədov da təhsil səviyyəsinin yüksəldilməsi, müəllim peşəkarlığının artırılması baxımından əhəmiyyətli olduğunu deyir. O da qiymətləndirmə meyarlarının düzgün tətbiq edilmədiyini düşünür. Kamran Əsədovun fikrincə, əməkhaqqı artımları ilə bağlı dəyişikliyə ehtiyac var. Müəllimlərə stimullaşdırıcı yanaşma tətbiq etmək lazımdır. 41 baldan 50 bala qədər toplayanlara 20 % əlavələr edilməlidir.
Təhsil eksperti Elşən Qafarov isə bu məsələdə fərqli yanaşma edilməsini tövsiyə edir. Onun sözlərinə görə, müəllimlər sertifikasiya imtahanında test mərhələsinə qədər bir neçə yoxlamadan keçirilməlidir. Yoxlamalardan sonra da onların əməkhaqları bir neçə meyar əsasında müəyyənləşdirilməlidir. Müəllimlərin psixoloji durumu, texniki bacarıqlarının və kompüter biliklərinin yoxlanılması da əsas faktorlardandır.

TƏHSİL MEDİA