Bu ixtisasları seçənlər işsiz qalmayacaq - gələcəyin ən etibarlı SAHƏLƏRİ
Müasir dövrdə texnologiyanın inkişafı və əmək bazarındakı yeniliklər bəzi ixtisaslara marağı daha da artırıb. Xüsusilə süni intellekt, informasiya texnologiyaları, rəqəmsal marketinq və səhiyyə kimi sahələrdə peşəkar mütəxəssislərə ehtiyac sürətlə yüksəlir.
Bu isə həmin ixtisaslarda rəqabətin ildən-ilə daha da güclənməsinə səbəb olur. Gələcəyini düzgün planlamaq istəyən gənclər üçün ən perspektivli və tələb olunan sahələri vaxtında müəyyənləşdirmək mühüm əhəmiyyət daşıyır.
Maraqlıdır, bu il ən çox hansı ixtisaslarda rəqabət güclənəcək?
Mövzu ilə bağlı AzEdu.az-a açıqlama verən ADPU SABAH mərkəzi akademik məsləhətçi, təhsil mütəxəssisi Əlmusa Atamalıyev qeyd edib ki, universitetə qəbul zamanı bu il əvvəlki illərlə müqayisədə daha çox informasiya texnologiyaları, süni intellekt, mühəndislik, səhiyyə və kənd təsərrüfatı yönümlü ixtisaslara marağın artacağı gözlənilir:
183082
"Bunun əsas səbəbi əmək bazarında məhz bu sahələr üzrə peşəkar kadrlara ehtiyacın yüksəlməsidir. Xüsusilə kompüter elmləri, informasiya təhlükəsizliyi, proqram mühəndisliyi və data analitikası kimi ixtisaslara tələb sürətlə artır. Şirkətlərin rəqəmsallaşması, süni intellekt texnologiyalarının geniş tətbiqi və kibertəhlükəsizlik risklərinin artması bu sahələri daha perspektivli edir. Fikrimcə, gələcək illərdə də ən yüksək maaşlı və rəqabətli peşələr əsasən İT sahəsində olacaq.
Mühəndislik sahələri də yenidən ön plana çıxır. Xüsusilə enerji mühəndisliyi, avtomatlaşdırma, inşaat mühəndisliyi və mekatronika üzrə ixtisaslara maraq artır. Bunun səbəbi ölkəmizdə infrastruktur layihələrinin genişlənməsi, sənayenin modernləşdirilməsi və texnoloji istehsala keçidin sürətlənməsidir. Səhiyyə istiqamətində də tələbatın artacağı hər il olduğu kimi gözlənilir.
Tibb, psixologiya, fizioterapiya, tibbi laboratoriya və reabilitasiya ixtisasları əvvəlki illərlə müqayisədə daha çox seçilə bilər. İnsanların sağlamlıq və psixoloji dəstəyə diqqətinin artması bu sahələrə marağı yüksəldir. Rəqəmsal marketinq və sosial media idarəçiliyi də yüksələn sahələr sırasındadır.
Ənənəvi reklam üsullarının yerini rəqəmsal platformaların alması şirkətləri bu sahədə peşəkar kadrlara daha çox ehtiyac duymağa məcbur edir. Xüsusilə kontent istehsalı, performans marketinqi və brend idarəçiliyi üzrə ixtisaslaşan şəxslər üçün imkanlar genişlənir".
Maliyyə texnologiyaları, biznes analitikası və layihə idarəçiliyi də əvvəlki illərlə müqayisədə daha çox tələb görəcək sahələrdəndir:
"Şirkətlər artıq qərarvermədə data əsaslı yanaşmaya üstünlük verdiyindən analitik düşüncəyə malik mütəxəssislərə ehtiyac artır. Fikrimcə kənd təsərrüfatı ilə bağlı ixtisaslar da son illərlə müqayisədə daha aktual hesab olunur.
Aqronomluq, aqromühəndislik, baytarlıq və qida mühəndisliyi kimi sahələrdə əmək bazarında boşluq olduğu bildirilsə də, buna baxmayaraq bu ixtisaslara maraq hələ də aşağıdır və yaxın illərdə bu istiqamətdə daha ciddi boşluqlar olacaq. Nəzərə alsaq ki, ölkəmizdə kənd təsərrüfatına xüsusi diqqət göstərilir, bu sahələr üzrə gənclərin ixtisaslaşması gələcək perspektiv baxımından yaxşı seçim olar.
Artıq abituriyentlər yalnız “populyar” görünən ixtisaslara deyil, gələcəkdə iş imkanı və praktik bacarıq qazandıran sahələrə üstünlük verməyə başlayırlar. Universitetlərimiz də təhsil proqramlarını əmək bazarının tələblərinə uyğunlaşdırmağa çalışır".
