Daha bir müəllim geyiminə görə müzakirə mövzusu oldu

Müəllimin dərs zamanı "V" və "W" hərflərinin tələffüzünü şagirdlərinə izah etdiyi görüntülər sosial şəbəkələrdə geniş müzakirəyə səbəb olub. Maraqlı metodika ilə diqqət çəkən dərsin videosu qısa müddətdə minlərlə insan tərəfindən paylaşılıb. Lakin videoda dərsin gedişatından daha çox müəllimin geyimi ön plana çıxıb və istifadəçiləri iki cəbhəyə bölüb.

Görüntülərdə müəllimin hərflər arasındakı fərqi vurğulamaq üçün etdiyi təkrar hərəkətlər və şagirdlərin yüksək səslə dərsa qatılması aydın görünür. Sinifdəki enerjili mühit və uşaqların həvəsi bir çox insan tərəfindən müsbət qarşılanıb. Bu yanaşma dərsin daha yaddaqalan olması üçün effektiv üsul kimi dəyərləndirilib.

Müzakirələrin əsas nöqtəsi isə müəllimin geyim tərzi ilə bağlıdır. Sosial şəbəkə istifadəçilərinin bir qismi bu geyimin təhsil ocağına və sinif mühitinə uyğun olmadığını bildirib. Onlar dərs zamanı şagirdlərin diqqətini dağıdacaq amillərdən qaçmağın vacibliyini müdafiə ediblər. Digər tərəf isə bu tənqidlərin həddindən artıq və lüzumsuz olduğunu düşünür. Onların fikrincə, əsas məsələ müəllimin geyimi yox, şagirdlərlə qurduğu səmimi ünsiyyət və dərsi sevdirmə bacarığıdır.

Qeyd edək ki, görüntülər Türkiyədə lentə alınıb.

İsmayıl
Demokrat.az