Şagirdlər bir neçə kitab əvəzinə bir planşetlə dərsə gedib-gələcəklər - AÇIQLAMA

"Təhsil İnstitutunun bazasında dərsliklərin hamısının elektron versiyası var. Əgər Elm və Təhsil Nazirliyinin belə bir təşəbbüsü olsa ki, bütün dərsliklər bir planşetdə cəmləşsin, xüsusilə ibtidai siniflər üçün, mənə elə gəlir ki, bunun öhdəsindən gəlmək olar".

Bu fikirləri Redaktor.az-a təhsil eksperti Məzahir Məmmədli məktəb dərsliklərinin elektronlaşdırılması məsələsindən danışarkən bildirdi.

"Hər ibtidai sinifdə oxuyan şagirdin bir planşeti olsa, elektron dərslikləri ora yükləməklə şagirdləri həm yükdən azad eləmiş olarıq, həm də artıq bir neçə kitab daşımaq əvəzinə bir planşetlə dərsinə gedib-gələ bilərlər. Amma təkcə bununla iş bitmir. İbtidai siniflər üçün bu planlar təklif olunmuşdu. Amma söhbət ondan gedir ki, birbaşa təmas, münasibət qurmaq, o tədrisin keyfiyyətli alınması üçün görünür hələ dərs vəsaitlərinə ehtiyac var", - deyə o, qeyd etdi.

Ekspert vurğuladı ki, bu gün dərsliklər təxminən elektron bir variantdadır:

"Yəni bir qalıb bunun rəsmiləşdirilməsi məsələsi ki, Elm və Təhsil Nazirliyi Nazirlər Kabinetinə müraciət eləsin. Məsələn, onlara ya əlavə pul ayrılsın, ya da dəstək olunsun. Elə bilirəm ki, bu sırf texniki bir məsələdir. Əsasən baza hissəsi var. Mən bildiyim qədərilə Təhsil İnstitutunda bütün dərsliklərin elektron versiyaları var. Görünür bu, müəyyən bir xərc tələb edən məsələdir və ölkənin hökuməti tərəfindən təsdiq olunmalıdır. Ona görə bir az zamana ehtiyac var".