tehsil.media saytı olaraq ARTİ təlimlərinin, layihələrinin yeyinti, pul silmə əməliyyatları üçün olduğunu birbaşa qeyd etmişik. Emin Əmrullayev təhsilə ayrılan maliyyəni ARTİ üzərindən özünküləşdirib, yeyintiyə çevirir. Təlimlər birmənalı olaraq uğursuzdur. Redaksiyamıza sonsuz sayda şikayətlər daxil olur. Xüsusilə aprel ayında "keçirilən" təlimlərin qiymətləndirilməsini şikayət edirlər. Hansı təlimin hansı qiymətləndirilməsini keçirirlər?!

Təlimçilərin bəziləri keçmədiyi üçün təlimin qiymətləndirmə testlərini özləri işləyir, hazır cavabları müəllimlərə göndərirlər, bəzi müəllimlər də xüsusi repetitorlara pulla testləri işlədirlər. Maraqlı budur ki, təlimçilərin işlədiyi testlərdə səhvlər çoxdur. Müəllimlər təlimçilərin səhvlərini tuturlar. Bir halda müəllimlər təlimçinin səhvini tutacaqsa, nəyə lazımdır bu təlimlər? Repetitorlar ARTİ təlimçilərindən savadlıdılarsa, Nazirlik həmin repetitorları işə cəlb etsin. Müəllimləri oyuncağa çevirməsin. Sualların çoxu çox sadə, yarı suallar verilən materialdan əlaqəsiz, yarı materiallar başlı-başına səhv. Bu biabırçılığı həqiqətən görən yoxdur?!

Şikayətlərin həddi-hüdudu yoxdur. Amma hamı tapşırır ki, anonim olsun. Yoxsa bizi işdən çıxararlar. Niyə müəllimlərə hədə-qorxu gəlirlər? Niyə müəllimləri şantaj edirlər? Niyə müəllimləri susdururlar?

Dəfələrlə təlimlərin maarifləndirici olmadığını və müəllimlərin davamlı şikayətləndiyini bildiririk. ARTİ təlimləri ya keçmir, ya da yola verir. Təlimə ayrılan pulu öncədən yeyirlər, sonra könülsüz şəkildə, təlimdən anlayışı olmayan savadsızlara təlim keçirirlər. Təlimlərin yarsı keçirilmir, 1 gün keçirilir, qalanı keçirilmir, üzündən slayd oxuyurlar, saatları birləşdirib 4 günə yola verirlər. Müəllimlər həmin təlimdən heç nə öyrənmirlər. Müəllimlər öyrənmək istəyirlər. Müəllimlər yenilikləri mənimsəmək istəyirlər. Amma əksinə öyrədən yoxdur. Müəllimlər davamlı bildirirlər ki, heç nə öyrədilmir, çox vaxt material verilmir, suallar cavablandırılmır. Yenilik varsa, öyrədin. Hansı müəllim başıaşağı olmaq istəyir? Hansı müəllim utanmaq istəyir? Hansı müəllim işini yerinə yetirmək üçün ona-buna yalvarmaq istəyir? İş görmək istəyirsinizsə, bəhanələrə sığınmayın. Bu insanları alçaltmaqdır, ələ salmaqdır. Siz milyonları yeyin deyə, bu qədər müqəddəs peşə sahibini alçalda bilməzsiniz! Madam sertifikasiya edirsiniz, onda öyrədin, maarifləndirin, suallara cavab verin, düzgün qiymətləndirmə edin. Niyə belə oyunlara əl atırsınız?!
Niyə aidiyyatı qurumlar lazım olanı etmir? Niyə təhsilə ayrılan milyonlarla maliyyə ancaq belə lazımsız, keçirilməyən təlimlərə və onlarla eyni bacarıqları formalaşdıran layihələrə ayrılır?
Bu qədər faktlar göstəririk. Bu qədər əsaslar gətiririk. Ümid edirik, artıq bu "MƏDƏNİ SOYĞUNÇULUĞA" son qoyular.