ASTARADA DİREKTOR HEGEMONLUĞU: R. HÜSEYNOVA BU DƏFƏ KİŞİ PSİXOLOQA HÜCUM ETDİ!

Bəli, Astara təhsilində, tam anlamıyla, dramatik hadisələr baş verməkdədir. Şəhər 4 saylı tam orta məktəbdə psixoloq və rəhbər işçi Yunis Dürüstün, rəhbərliyin şagirdlərə münasibətini gündəmə gətirməsindən sonra, direktor Rəna Hüseynovanın ona münasibəti daha da aqressivləşib. Görüntülərdən də, göründüyü kimi, yaşlı qadın direktor, heç çəkinmədən cavan kişi psixoloqa hücum edir! Yəni, fiziki olaraq, ona gücünün çatmayacağını bildiyi halda, bu hücumun edilməsi, şişmiş özgüvəndən və ifrat arxayınçılıqdan başqa bir şey deyil. O, bilir ki, psixoloq ona heç nə edəsi deyil və ona etdikləri, cavabsız qalacaq.
Bu hadisənin, bu hücumun özü belə, məktəbdəki və ümumilikdə, cənub təhsilindəki böhranı sübut edən göstəricidir.

Çox ibrətlidir ki, bir neçə gün öncə, direktorun və müavininin şagirdlərə zorakılığını əks etdirən sujet, təhsil cameəsində şok effekti yaratdı, lakin Lənkəran-Astara Regional İdarəsi sanki heç nə olmamış kimi, məsələni görməzdən gəldi. Onlar, yəqin ki, indiyəqədər səbrini basıb susmuş psixoloqdan belə çıxış gözləmirdilər, yaxud da qoluzorlu direktoru cəzalandırmağı niyəsə münasib bilmirlər. Lakin, bu dəfə artıq direktorun, şagirdləri müdafiə edən psixoloqa etdiyi hücum, görünür ki, onları əməllicə çətin duruma salıb və problemin, sandıqlarından daha böyük "xəsarət" verəcəyini anlamağa başlayıblar. Lakin, hələ də lazımı qərarı vermələləri göstərir ki, böyük ehtimalla, zaman qazanmağa çalışırlar və məsələnin "soyumasını" gözləyirlər. Ancaq, psixoloq, güman ki, hər senariyə hazırlıqlıdır.
Fikrimizcə, bu vəziyyətdə, Elm və təhsil naziri cənab Əmrullayevin dərhal məsələyə müdaxilə edib, direktoru və bir müddət sonra isə müavinini işdən çıxarması, artıq ən birinci onun öz nüfuzu baxımından qaçılmazdır. Göründüyü kimi, məktəbin psixoloqu Y. Dürüst əsla geri çəkiləcək birisinə oxşamır və əksinə, əlindəki dramatik sübutları təqdim etməyə davam edəcəkdir. Sözsüz ki, artıq Rəna Hüseynovanın heç bir şansı qalmayıbdır, lakin kresloda qalmaqda dirəndiyi hər gün, həm özünü, həm də LARTİ rəhbəri Bəhruz Mehdiyevi çətin duruma salmaqdadır. Dolayısıyla da, zərbə, Elm və Təhsil Nazirliyindən yan keçə bilməz.
Baxaq görək: böhranı həll edib, "metastaz" verən əzanı "kəsib atmaq"da LARTİ və Nazirlik heç olmasa, bundan sonra soyuqqanlı və cəld davranacaqmı?