Özəl bağçalarda 1000-ə yaxın uşağın təhsil haqqını dövlət ödəyir

Hazırda 1000-ə yaxın uşaq özəl bağçalarda dövlət vəsaiti hesabına təlimlərə cəlb edilib.

Bunu Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov Gənc tərbiyəçi-müəllimlər üçün təhsil forumunda çıxış edərkən deyib.

Onun sözlərinə görə, dövlət təhsil müəssisələrinə qəbul ola bilmədiyi üçün Elm və Təhsil Nazirliyi tərəfindən elan olunan “Özəl məktəbəqədər təhsil müəssisələri üçün qrant müsabiqəsi” çəçivəsində seçilmiş bağçalara cəlb edilən uşaqların təhsil haqqının yarısını dövlət öz üzərinə götürüb: ”Qrant vəsaitləri hesabına ayrı-ayrı regionlarda məktəbəqədər təhsillə əhatə olunma səviyyəsini artırmağa nail olmuşuq. Bu göstərici çox yüksək olmasa da, düşünürük ki, bu sahədə inkişaf ola bilər. Növbəti illərdə bu sayların on minlərlə olmasını arzu edirik və hədəfləyirik. Ümumiyyətlə hesab edirik ki, ölkədə bütün bağça yaşlı uşaqların təhsilə cəlbi üçün ənənəvi bağça modeli uğurlu hesab olunmur. Bu sahədə bütün yük dövlətin üzərində olmamalıdır. Dövlət-özəl tərəfdaşlığı bu sahəyə çox ciddi töhfələr verməlidir".