"Görünən odur ki, Putin Qarabağda yaşayan ermənilərin bir çoxunu İrəvana köçürərək orada vəziyyəti daha də qəlizləşdirib Paşinyanı devirməkdə israrlıdır. İrəvan erməniləri ilə bu iş alınmır, indi əhalinin “ülvi” hisslərini istismar etməklə, “qaçqın-köçkün” hekayəsini alovlandırmaqla çevriliş hazırlayır".

Bu fikirləri "tehsil.media"a açıqlamasında REAL-ın icra katibi Natiq Cəfərli səsləndirib. O bildirib ki, Paşinyanın artıq itirəcəyi heç nə yoxdur: "Ermənistanın 10 Noyabr bəyanatından çıxdığını elan etsə, oktyabrın əvvəlində Avropada baş tutacaq görüşdə sülh sazişinin qarşılıqlı ərazi bütövlüyünün tanınması ilə başlayan ilk protokolunu inzalasa, daha məqsədəuyğun olar. Bu zaman “rusməramlıların” Qarabağda qalması üçün bütün hüquqi təməl çökər. Bəs bu, niyə vacibdir? Bu gün Rusiya da, Qərbin bəzi savadsız siyasətçiləri də Qarabağda yaşayan erməni əhalisinin təhlükəsizliyinə bir tək Azərbaycanın məsuliyyət daşıdığını deyirlər. Təbii ki, Azərbaycan dövləti və hökuməti öz ərazisində yaşayan erməni əsilli azərbaycanlıların təhlükəsizliyinə zəmanət verməlidir, təmin etməlidir. Amma o şərtlə ki, həmin bölgədə digər əlisilahlı heç bir qüvvə olmasın. Ya biz elan etməliyik ki, ola biləcək provokasiyalara görə “rusməramlılar” məsuliyyət daşıyır, ya da deməliyik ki, siz çıxın, ərazidə başqa heç bir silahlı qüvvə qalmasın, o zaman da bütün məsuliyyəti biz öz üzərimizə götürürük. Nə qədər ki, ruslar oradadır, istənilən provokasiya törədib bunu Azərbaycanın üzərinə ata bilərlər", - deyə Natiq Cəfərli fikirlərini tamamlayıb.