MİQ sualları sızdırılıb? - RƏSMİ AÇIQLAMA

Xəbər verdiyimiz kimi, 11 iyul tarixindən etibarən dövlət ümumi təhsil müəssisələrinə müəllimlərin işə qəbulu üzrə müsabiqənin test imtahanı mərhələsi başlayıb.


Bəzi şəxslər müəllimlərin işə qəbulu (MİQ) ilə bağlı sosial şəbəkələrdə yayılmış test tapşırıqlarının imtahanda təqdim olunan suallarla eyni olması ilə bağlı iddialar irəli sürüb.

tehsilmedia.info azedu.az-a istinadən, xəbər verir ki, Təhsil İnstitutunun nəzdindəki İnsan Resursları Mərkəzi sözügedən məsələ ilə bağlı iddialara cavab verib:

"Gün ərzində test imtahanlarında 10 mindən çox namizəd iştirak edir. Test imtahanı başa çatdıqdan sonra namizədlərə cavablandırdıqları sualların düzgün cavabları ilə tanış olmaq imkanı yaradılır. Həmçinin hər imtahan gününün sonunda namizədlərə təqdim olunan test tapşırıqlarının video-izahı yayımlanır.

Qeyd edək ki, ötən gün sosial şəbəkələrdə yayılmış test tapşırıqlarının imtahanda təqdim olunan suallarla eyni olması ilə bağlı yayılan iddialar əsassızdır. Belə ki, test tapşırıqlarından biri faktoloji biliyi yoxlayır, sualın şərti və şəkli 9-cu sinif "İnformatika" dərsliyində təqdim olunmuşdur. Digər sual isə "İnformasiyanın kodlaşdırılması" və "Say sistemləri" mövzularının sintezi şəklində tərtib olunan yeni tipli tapşırıqdır və heç bir test toplusunda yoxdur".

Mərkəz indiyədək keçirilən müsabiqə nəticəsində minlərlə insanın iş yeri qazanaraq məktəblərdə keyfiyyətli tədrisin təşkilinə töhfə verməsini nəzərə alsaq, bu tipli paylaşımların müəlliflərini ictimaiyyətdə fikir çaşqınlığı yaratmamağa çağırıb.