Məktəblərdə son həftə rəzaləti: "Qaçdı-tutdu" oyunu
2025-2026-cı tədris ilinin son həftəsidir, müəllimlər KSQ və BSQ içində üzürlər. Amma ən acınacaqlısı bilirsiniz nədir? Müəllim şagirdə az qala yalvarır ki, gəl imtahanını yaz. Təhsili və müəllimi bu qədər alçaltmaq olmaz.
Qaydaya görə, KSQ dərs ilinin əvvəlində, BSQ isə rəhbərlik tərəfindən öncədən elan edilir. İmtahana gəlməyən şagirdə qanuna uyğun şəkildə cavab verilməlidir. Müəllimi dilənçi kimi camaatın evinə göndərib "qaçdı-tutdu" oynatmaq lazım deyil. Sırf sənəddə hər şey yaxşı görünsün deyə yalandan qiymətlər saxtalaşdırılır. Monitorinqlər də, KSQ və BSQ-lər də yarandığı gündən bəri bu vəziyyətdədir.
Hələ bəzi məktəblər yenə insaflıdır, sadəcə müəllimi göndərirlər ki, get şagirdini tap gətir. Elə yerlər var ki, gəlməyənə rüşvətlə qiymət yazılır, rəsmi jurnal ləğv edilib yenisi tərtib olunur. Hətta iki jurnal tutub, biri ilə uşaqları qorxudan, ikincisini isə rəsmi sənəd kimi saxlayanlar var.
Əgər ədalət yoxdursa və qanunlar sadəcə şablon xarakter daşıyırsa, insanlar da gizli yollarla qanunsuzluq etməyi öyrənir. Elə Nazirlik özü də buna göz yumur və yummalıdır da. Çünki bu mənzərə elə öz əkdikləri ağacın barıdır.
Sakit Muradov
