Müəllimlərə niyə bayram mükafatı verilmir? - maaşları artırılsa...

"Müəllimlərə bayramlarda əlavə ödənişlər verməkdənsə, maaşların artırılması daha məqsədəuyğun olar".

Mövzu ilə bağlı AzEdu.az-a açıqlama verən təhsil eksperti Ramin Nurəliyev bildirib ki, əmək haqlarının mərhələli şəkildə artırılması uzunmüddətli perspektivdə daha məqsədəuyğun olardı və bu halda əlavə premiyalara ehtiyac da azalardı.

"Xüsusi günlərdə və bayramlarda bir çox qurum tərəfindən əməkdaşlara müxtəlif premiyalar, maaşa əlavələr və ya xüsusi hədiyyələr təqdim olunur. Lakin Nazirliyin və ümumilikdə müəllimlərin sayının kifayət qədər çox olması belə mükafatların verilməsi üçün xeyli maliyyə vəsaiti tələb edir. Müəllimlərin bu cür premiyalardan geri qalmasının əsas səbəbi də məhz bu amillə bağlıdır.

Təhsil sahəsində bəzi müəssisələrdə xüsusi günlərdə və bayramlarda əməkdaşlara əmək haqqına əlavələr şəklində mükafatların verildiyi hallara da rast gəlinir.

Müəllimlərin sayı çox olduğundan veriləcək məbləğ də yetərli olmalıdır. Onun sözlərinə görə, təxminən 150 min müəllim nəzərə alındıqda, hər müəllimə 1 manat ödənilməsi 150 min manat, 10 manat ödənilməsi isə 1 milyon 500 min manat vəsait deməkdir. Əgər hər müəllimə ən azı 200-300 manat mükafat verilməsi nəzərdə tutulsa, bu, 15-20 milyon manatdan artıq vəsait tələb edir ki, bu da kifayət qədər böyük məbləğdir".

Ekspert hesab edir ki, bir qrup müəllimə mükafat verib digərinə verməmək də düzgün yanaşma olmaz.

"Məhz bu səbəblərdən təhsil işçilərinə, xüsusilə müəllimlərə bayram premyalarının verilməsi məsələsi hazırda gündəmdə deyil. Əmək haqlarının mərhələli şəkildə artırılması daha davamlı və məqsədəuyğun həll yolu ola bilər və bu halda əlavə premiyalara ehtiyac da azalacaq".