Abşeron-Xızı Regional Təhsil İdarəsinin müdiri Xızı rayonunda yerləşən təhsil müəssisələrinə səfər edib
Abşeron-Xızı Regional Təhsil İdarəsinin müdiri İlhamə Abdullayeva Xızı rayonu ərazisində yerləşən təhsil müəssisələrinə səfər edib.
Səfər çərçivəsində Sitalçay kənd uşaq bağçası və Sitalçay kənd tam orta ümumi təhsil məktəbində olub, təhsil müəssisələrinin mövcud vəziyyəti ilə yerində tanışlıq aparılıb.
Müəssisələrdə tədris mühiti, sinif otaqlarının vəziyyəti, istilik sistemi və maddi-texniki təminat məsələləri diqqət mərkəzində saxlanılıb.
Sitalçay kənd uşaq bağçasında uşaqların gündəlik qidalanma rejimi, menyunun tərtibi, sanitar-gigiyenik qaydalara əməl olunması, təhlükəsizlik və uşaqların yaş xüsusiyyətlərinə uyğun inkişaf mühitinin təşkili məsələlərinə xüsusi diqqət yetirilib. Bağçada təlim-tərbiyə prosesinin təşkili və pedaqoji heyətin fəaliyyəti ilə bağlı müzakirələr aparılıb.
İlhamə Abdullayeva eyni zamanda ümumtəhsil müəssisəsində dərs prosesini izləyib, sinif otaqlarına baxış keçirib, məktəb rəhbərliyi ilə görüşərək mövcud məsələlər, xüsusilə istiliklə bağlı vəziyyət ətrafında fikir mübadiləsi aparıb və müvafiq tapşırıq və tövsiyələrini verib.
Səfərin əsas məqsədi təhsil müəssisələrində tədrisin keyfiyyətinin yüksəldilməsi, uşaqlar və şagirdlər üçün təhlükəsiz və səmərəli təhsil mühitinin təmin olunması, eləcə də təhsilalanların bilik və bacarıqlarının inkişafına yönəlmiş tədbirlərin gücləndirilməsidir.
