Rektorlardan yeni il sürprizi: Əməkdaşlara bu qədər pul VERİLƏCƏK

Yeni il yaxınlaşdıqca universitetlərdə ilin yekunu ilə bağlı fərqli ab-hava hiss olunur. Bu il bir sıra ali təhsil müəssisələrində rəhbərlik bayramı təkcə şablon təbrik mesajları ilə deyil, daha praktik addımlarla qeyd edib. Bir çox universitetin rektoru Yeni il münasibətilə ali məktəbin bütün əməkdaşlarına pul mükafatı təqdim edib.

AzEdu.az əməkdaşlarına pul hədiyyəsi təqdim edən universitetlərin siyahısını hazırlayıb.

ADNSU-da rektor Rüfət Əzizovun imzaladığı müvafiq əmrə əsasən, bayramlarla əlaqədar universitetin bütün əməkdaşlarına 1000 manat məbləğində mükafat verilib.

UNEC-də isə rektor Ədalət Muradovun əmri ilə universitetin bütün əməkdaşlarına bayram münasibətilə 500 manat mükafat ayrılıb.

Qarabağ Universitetinin rektoru Şahin Bayramovun əmrinə əsasən universitetin bütün əməkdaşlarına 500 manat mükafat verilib.

Azərbaycan Dövlət Rəssamlıq Akademiyasında rektor Natiq Əliyevin müvafiq əmrinə əsasən, akademiyanın əməkdaşlarına bayramlarla əlaqədar bir aylıq əməkhaqqı həcmində mükafat ödənilib.

Azərbaycan Memarlıq və İnşaat Universitetində də bir aylıq əməkhaqqı həcmində birdəfəlik mükafat ödənilib. Bununla bağlı rektor Gülçöhrə Məmmədova tərəfindən müvafiq əmr imzalanıb.

Mingəçevir Dövlət Universitetində rektor Anar Eminovun imzaladığı əmrə əsasən, MDU-nun bütün əməkdaşlarına 300 manat məbləğində bayram mükafatı verilib.

UNEC-in Zaqatala filialında isə direktor Raqif Qasımovun müvafiq əmri ilə filialın bütün əməkdaşlarına bayramlarla əlaqədar 200 AZN mükafat təqdim olunub.