Bəzi yerlərdə məktəblərin olmasına ehtiyac yoxdur

Müəllimlərin işə qəbulu imtahanı ilə bağlı statistikaya əsasən son 3 ildə 2000-dən çox vakant yer namizədlər tərəfindən seçilmir. Bu yerlər əsasən ucqar dağ kəndlərində yerləşən məktəblərdir.

Ucqar rayonlarda vakant yerlərə müəllimləri cəlb etmək üçün nələr edilməlidir?

Milli Məclisin Əmək və sosial siyasət komitəsinin deputatı Musa Quliyev AzEdu.az-a mövzu ilə bağlı müsahibə verib.

Deputat bildirib ki, elə dağ kəndləri var ki, orada məktəblərin olmasına ehtiyac yoxdur:

“Orada təhsil alan şagirdlərin avtobuslarla yaxın kəndlərə aparılıb-gətirilməsi, yaxud da mərkəzi böyük bir kənddə yataqxana tipində məktəbin qurulması daha uyğundur, nəinki hər kənddə məktəbin fəaliyyət göstərməsi. Çünki bəzi ərazilərdə həm uşaqların sayı azdır, həm də müəllimlərin. Bir çox hallarda ucqarlarda müəllimlərin qalmağa şəraitləri olmadığı üçün orada işləyə bilmirlər.



MİQ imtahanlarından uğurla keçən müəllimlərin dağlıq rayonlarda işləməsi üçün davamlı stimullaşdırılma işləri aparılmalıdır. Buraya müəllimlərin maaşlarının artırılması, əlavə mükafatların və yaxud müavinətlərin verilməsi, kommunal və yol xərclərinin qarşılanması aiddir.



Ucqar yerlərdə vakant yerlərin doldurulması üçün müəllimlər cəlb olunmalı yaxud məktəblər birləşdirilməlidir. Bəzən 1 sinifdə 3-5 uşaq olur. Ondan ötrü sinif saxlamağa, ayrı-ayrı fənn müəllimlərini cəlb etməyə ehtiyac yoxdur. Bəzən müəllimlərin sayı məktəbdəki uşaqların sayından çox olur. Həmin məktəbin saxlanma, təsərrüfat, kommunal, müəllimlərin xərcləri üçün əlavə maliyyə ayrılmalıdır. Bu xərclərin əvəzinə ortaq avtobusa maliyyə ayıraraq uşaqları bir kənddən digərinə aparmaq, həftə sonu isə evlərinə gətirmək olar. Bu şəraitləri yerlərə uyğun qiymətləndirmək daha sərfəlidir, nəinki 2-3 uşaqdan ötürü müəllimləri dağlıq ucqar ərazilərə göndərmək”.