Aprelin 28-də Mingəçevir Dövlət Universitetinin (MDU) Humanitar fənlər kafedrasının təşkilatçılığı ilə görkəmli oftalmoloq alim, akademik Zərifə Əliyevanın anadan olmasının 100 illiyinə həsr olunan "Zərifə xanım Əliyeva: ürəklərdə əbədiləşən nurlu xatirə” mövzusunda dəyirmi masa keçirilib.

MDU-dan "tehsil.media"a bildirilib ki, kafedra müdiri, dosent Esmira Cəfərovanın moderatorluğu ilə keçirilən dəyirmi masada universitetin akademik və inzibati heyət üzvləri, tələbələr və magistrantlar iştirak ediblər.

Tədbirdə akademik Zərifə Əliyevanın əziz xatirəsi bir dəqiqəlik sükutla yad edilib, dəyərli ziyalının zəngin həyat və fəaliyyətini əks etdirən videoçarx izlənilib.

Sonra çıxış edən universitetin gənc akademik heyət üzvləri və tələbələr qeyd ediblər ki, Ulu Öndər Heydər Əliyevin ömür-gün yoldaşı, müzəffər Ali Baş Komandanımız İlham Əliyevi yetişdirən cəfakeş ana Zərifə Əliyeva şərəfli ömür yolu keçib, yüksək mənəvi keyfiyyətləri və çoxşaxəli nümunəvi fəaliyyətləri ilə xalqımıza misilsiz örnəklər miras qoyub.

Çıxışlar böyük maraqla qarşılanıb.