2023-cü ilin mayın 2-də Mingəçevir Dövlət Universitetində (MDU) görkəmli oftalmoloq alim, akademik Zərifə xanım Əliyevanın anadan olmasının 100 illiyinə həsr olunan "Zərifə xanım Əliyeva: Daim ürəklərdə yaşayan nurlu və xeyirxah insan” mövzusunda elmi konfrans keçirilib.

Bu barədə "tehsil.media" a MDU-dan bildirilib. 

Əvvəlcə Əməkdar elm xadimi Zərifə xanım Əliyevanın əziz xatirəsi bir dəqiqəlik sükutla yad edilib.

Konfransın açılışında MDU-nun rektoru Şahin Bayramov çıxış edib. Rektor çıxışında Zərifə xanım Əliyevanı dəyərli alim, mehriban və qayğıkeş oftalmoloq həkim kimi xarakterizə edib. Bildirib ki, Azərbaycan oftalmologiya elmi məktəbinin banisi, ümummilli lider Heydər Əliyevin vəfalı ömür-gün yoldaşı və yaxın silahdaşı, müasir qüdrətli dövlətimizin başçısı və müzəffər Ali Baş Komandan İlham Əliyevin anası Zərifə xanım Əliyeva zəngin və şərəfli ömür yolu keçib, çoxşaxəli uğurlu fəaliyyətləri ilə xalqımızın qəlbində əbədi izlər qoyub. Şəxsiyyətin formalaşmasında ailə mühitinin rolundan danışan rektor xalqımıza və dövlətimizə qalib lider yetişdirən Zərifə xanım Əliyevanı qəhrəman və cəfakeş ana kimi səciyyələndirib. Prezident İlham Əliyev kimi müdrik şəxsiyyət və qəhrəman sərkərdəyə sahib olduğumuz üçün Zərifə xanıma borclu olduğumuzu bildirən Ş.Bayramov onun nümunəvi həyat yolunun gənc nəsillər arasında təbliğ edilməsinin önəmini diqqətə çatdırıb və konfransın işinə uğurlar arzulayıb.

Sonra, akademik Zərifə xanım Əliyevanın zəngin həyat və fəaliyyətini əks etdirən videoçarx izlənilib.

Daha sonra, konfransın proqramına uyğun olaraq məruzələr dinlənilib. MDU-nun Humanitar fənlər kafedrasının müdiri, dosent Esmira Cəfərova "Zərifə xanım Əliyevanın nur saçan portreti”, dosent Namaz Manafov "Böyük ziyalılıq və xeyirxahlıq nümunəsi: Zərifə Əliyeva”, Təhsil fakültəsinin dekan müavini, dosent Flora Namazova "Həyatı və əməlləri ilə başqalarının da ömrünü işıqlandıran xeyirxah alim”, müəllim Ayna Babazadə "Gənclərə örnək olan nurlu ömür salnaməsi” mövzusunda məruzələrlə çıxış ediblər.

Məruzələr iştirakçılar tərəfindən böyük maraqla qarşılanıb.

Qeyd edək ki, MDU-da Zərifə xanım Əliyevanın anadan olmasının 100 illiyinə həsr olunan çoxsaylı tədbirlər həyata keçirilir.