Beyin axını! - Həkimdən rektora MÜRACİƏT: "...əlinizdə, ovcunuzda saxlayın"
"Azərbaycanlı ziyalıların, xüsusilə də, həkimlərin xaricə getməsinin yeganə səbəbi onlara layiq olduqları qiymətinin verilməməsidir. Biz oxuduğumuz dövrdə ali təhsil müəssisəsini qırmızı diplomla bitirənlər universitetin müxtəlif kafedralarında saxlanılırdı. Həmin gənclər elmi işə cəlb edilirdilər və onlardan gələcək alimlər yetişirdi".
tehsilmedia.info xəbər verir ki, bunu "Sherg.az"a açıqlamasında həkim-nevroloq Qalib Əsədov deyib. O, vurğulayıb ki, universiteti qırmızı diplomla bitirən "n" sayda gənc tanıyır, lakin ali təhsil müəssisələri heç birinə əl uzatmayıb, köməklik göstərməyib:
"Elmi potensialı yüksək olan məzunları kafedralarda saxlamadıqları üçün hamısı xaricə üz tuturlar. Onlardan biri elə öz oğlumdur. Tibb Universitetini qırmızı diplomla bitirdi, hazırda Türkiyəyə getməyə hazırlaşır. Bizim Tibb Universitetinə lazım olmadı, amma İstanbul Universiteti yüksək əmək haqqı müqabilində dəvət etdi. Ali təhsil müəssisələri əlaçı, savadlı, bilikli tələbələri itirir. "Bəli, baş üstə" deyən, sözəbaxan, ələbaxan, müti tipli, professorun hər sözünü dəftərçəsinə qeyd edən, kölə təfəkkürlü tələbələri ali məktəblərdə saxlayırlar. Bəs elmli, ziyalı adamlar harada, hansı maaşla, necə işləsinlər?! Məcburən ölkəni tərk edirlər. Azərbaycanın əsas problemlərindən biri beyin axınıdır. Savadlı kadrların xarici ölkələrə üz tutması gələcəkdə ciddi problemlər yarada bilər".
Həkim-nevroloq xüsusilə, Tibb Universitetinin rektoru Gəray Gəraybəyliyə müraciət edib:
"Qırmızı diplomla təhsilini başa vuran, Azərbaycanın istedadlı tələbələrini əlinizdə, ovcunuzda saxlayın. Onları universitetlərdə, kafedralarda işlə təmin edin. Həmin gənclər Azərbaycan səhiyyə sisteminin, tibb elminin uğurlarını artırmaq üçün əməli işlər görsünlər. İstedadlı gənclərə rəqib gözüylə baxmayın, universitetdən uzaqlaşdırmayın. Niyə təhsilini qırmızı diplomla başa vuran adamların xarici ölkələrə getməsinə, orda işləməsinə səbəb olursunuz?! Axı gedənlərin çox az hissəsi qayıdır. Rektorsunuz, savadlı, elmi potensiallı, istedadlı məzunları həvəsləndirməli, elmi işlərə cəlb etməlisiniz. Amma əksini görürük. Təəssüf ki, universitetdə qalıb, fəaliyyətini davam etdirənlər, işə başlayanların əksəri oxuduğu müddətdə nailiyyətləri ilə çox da seçilməyən tələbələrdir".
Qeyd edək ki, Alman Tibb Assosiasiyasının 2022-ci ilin dekabrına olan statistikasına görə, Almaniyada 421.000 həkim çalışır. Onlardan 60 minə yaxını (14 faizdən çoxu) xarici ölkələrdən gələn həkimlərdir. Almaniyaya gedən azərbaycanlı həkimlərin sayı isə 1359 nəfərə çatıb.
