Dövlət Proqramına qəbulda süni intellektdən istifadə ediləcək
“Qəbul prosesində müxtəlif alətlərdən istifadə olunur və xüsusilə rəqəmsal alətlərin rolu olduqca vacibdir”.
AzEdu.az xəbər verir ki, bunu “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”na sənəd qəbulu ilə bağlı jurnalistlərə açıqlamasında Dövlət Proqramı İdarəetmə Qrupunun layihə rəhbəri Qədir Xəlilov deyib.
O qeyd edib ki, ilk dəfə olaraq müasir tendensiyalara uyğun şəkildə qəbul prosesində süni intellekt alətlərinin tətbiqi nəzərdə tutulur.
Q.Xəlilov bildirib ki, bu yanaşma həm qəbul prosesinin şəffaflığının artırılmasına, həm də onun daha düzgün və operativ aparılmasına imkan yaradacaq.
Onun sözlərinə görə, bəzi müraciətçilər tərəfindən təqdim olunan sənədlərin sayı 15-20-yə qədər çatır və bu sənədlərin hər birinin ayrıca yoxlanılması kifayət qədər vaxt aparır.
Layihə rəhbəri vurğulayıb ki, müasir texnologiyalardan, o cümlədən süni intellekt imkanlarından istifadə etməklə sənədlərin təkrar və daha sürətli yoxlanılması mümkün olacaq.
Bu, tam şəkildə süni intellektə keçid demək deyil:
“Məqsədimiz bu texnologiyanın tətbiq imkanlarını sınaqdan keçirmək və əldə olunacaq nəticələri qiymətləndirməkdir. Bu il bu istiqamətdə ilkin addımların atılması planlaşdırılır”.
