GERİLƏYİRİK!!! Təhsilin "Qara Dəliyi": Üç Qurum, Sıfır Nəticə!
"“U.S news”a istinadən xəbər verir ki, Avropa və Şimali Amerikada yaşayan 17 min respondetin iştirak etdiyi sorğuda ölkəmiz 2023-cü illə müqayisədə bir pillə geriləyərək 66-cı yerdən 67-ci yerə düşüb."
Beynəlxalq hesabatlar bir daha üzümüzə şillə kimi dəydi: Azərbaycan təhsili irəli getmək əvəzinə, dünyadan bir addım da geriyə düşdü. Bəs hər gün efirlərdə, saytlarda fəxrlə təqdim olunan o "möhtəşəm" yeniliklər, "parlaq" layihələr hanı? Görünən odur ki, ETN, ARTİ və MÜTDA-nın fəaliyyəti təhsilin keyfiyyətini qaldırmağa deyil, sadəcə büdcədən ayrılan milyonları kağız üzərində "əritməyə" xidmət edir.
Tehsilmedia.az qeyd edir ki, ortada acı bir həqiqət var: Təhsilimiz islahat adı altında darmadağın edilir. ARTİ-nin hazırladığı o "elmi" metodikalar sinif otaqlarına çatmır, MÜTDA-nın keçirdiyi mənasız təlimlər isə müəllimi inkişaf etdirmək əvəzinə, onu bürokratiya bataqlığında boğur. Müəllim şagirdə dərs keçməli olduğu halda, bu qurumların uydurduğu saysız-hesabsız hesabatları doldurmaqla, "layihə" oyunlarına qurban edilməklə məşğuldur. Nazirlik isə ancaq monitorinqlər keçirib "hər şey qaydasındadır" görüntüsü yaratmaqla özünü aldadır.
Bəs hanı o "strateji" addımlar? Hanı o "tarixi" qərarlar? Əgər bu qədər hay-küyün, bu qədər xərclənən vəsaitin nəticəsi 66-cı yerdən 67-yə yuvarlanmaqdırsa, deməli, bu sistem kökündən çürüyüb. Bu qurumlar təhsilimizi çiçəkləndirmir, əksinə, onu öz mənasız və səmərəsiz proqramlarının girovuna çevirirlər. Şagirdin gələcəyi ilə oynamaq, dövlətin vəsaitini boş-boş işlərə xərcləmək sadəcə səriştəsizlik deyil, bu, ölkənin gələcəyinə qarşı edilən ən böyük vicdansızlıqdır.
Reytinqlər göstərir ki, dünya sizin "pulyeyən" layihələrinizə deyil, real biliyə qiymət verir. Və təəssüf ki, o real bilik sizin o "parıltılı" ofislərinizdən və saxta hesabatlarınızdan çox-çox uzaqdadır.
