Xəbər lenti

Məktəb divarları arasında hər gün minlərlə hekayə yazılır. Bu hekayələrin ən gözəl, ən fədakar qəhrəmanları isə şübhəsiz ki, qadın müəllimlərimiz və gələcəyin işıqlı simaları olan qızlarımızı.

8 Martı məktəbdə qeyd etmək bizim üçün sadəcə bir ənənə deyil; bu, bir nəslin yetişməsində can qoyan, hər dərsində şagirdinə ana qayğısı ilə yanaşan, biliyi sevgisi ilə yoğuran xanımlara olan sonsuz ehtiramımızın ifadəsidir.

Əziz müəllimlərimiz! Siz təkcə düsturları, tarixləri və qaydaları öyrətmirsiniz. Siz həm də dürüstliyi, nəzakəti və xəyal qurmağı aşılayırsınız. Sizin səbriniz və müdrikliyiniz məktəbi sadəcə bir bina olmaqdan çıxarıb, isti bir yuvaya çevirir.

Sevimli şagirdlərimiz! Siz bizim gələcəyimiz, sabahın alimləri, həkimləri və sənətkarlarısınız. Qəlbinizdəki o saflığı və öyrənmək eşqini heç vaxt itirməyin. Unutmayın ki, təhsilli bir qadın, təhsilli bir cəmiyyət deməkdir.

Bu bayram günündə arzu edirik ki, baharın gəlişi ilə gələn bu təravət bütün il boyu ruhunuzda qalsın. İşinizdə uğurlar, evinizdə hüzur, qəlbinizdə isə hər zaman bahar olsun.
Bayramınız mübarək, əziz xanımlar!

Təlimçi, pedaqoq, metodika üzrə mütəxəssis Məmmədova Sevinc