Şagirdi döyməklə gündəmə gələn məktəb direktoru Ruslan İbayev başqalarının əvəzinə sənədə imza ataraq vəzifə saxtakarlığına yol verib...

İmişli rayonu Hacıalmuradlı kənd orta məktəbinin direktoru Ruslan İbayev məktəbin Həmkərlar Təşkilatının rəhbərini tutduğu vəzifədən uzaqlaşdırmaq üçün saxtakarlıq edərək işçilərin əvəzindən imza atmaqda ittiham olunur.

Bu barədə AzFakt.com-un əldə etdiyi məlumata görə, İmişli rayon Prokurorluğunda vəzifə saxtakarlığına görə direktor Ruslan İbayevə cinayət işi açıblar. Həmin cinayət işində Ruslan İbayev 7 işçinin imzasını saxtalaşdırmaqda ittiham olunur.

Bildirək ki, Ruslan İbayev bir müddət əvvəl məktəbdə şagirdi döyməsi ilə gündəmə gəlib. Həmin hadisənin görüntüsünün sosial şəbəkələrdə yayılmasından sonra məktəb direktoru barədə araşdırma başladılıb.

Ancaq Mil-Muğan Regional Təhsil İdarəsinin müdiri Bəhruz Nəbili bütün gücü ilə Hacıalmuradlı kənd orta məktəbinin direktoru Ruslan İbayevi qorumağa və vəzifəsində saxlamağa çalışdığı bildirilir.

Məhz buna görə məktəb direktorunun şagirdi döyməsi barədə başladılan araşdırma uzadılır.