ARTİ-nin getdikcə məhv olan elmi statusu

Könül Nəhmətin feysbukda paylaşdığı tənqid əslində dürüst tənqiddir. Təəssüf ki, ARTİ artıq heç bir elmi statusu daşımır. "Kursçular" idarə edir, təhsillə əlaqəsi olmayanlar, elmi statusu olmayanlar təhsili daha çox məhv edirlər. Hələ bu da az imiş kimi şagirdlərin, xalqın, millətin təhsilini də, mentalitetini də, dəyərlər sistemini də məhv edirlər.

"Azərbaycan Respublikasının Təhsil İnstitutunun əməkdaşlarını kimsə inandırıb ki, elmi məqalənin (hələ yazdıqlarını elmi məqalə saymaq olarsa) nəticə hissəsini "beləliklə" sözü ilə başlamaq lazımdır.
Diqqətinizə çatdırım ki, "Nəticə" başlığı ilə fərqləndirilən hissə məqalədə bitkin bir tərkib hissəsidir, müstəqil bir mətn strukturunda yazılmalıdır. Mətnin tərkibində başlıqlarla ayrılan hissələri modal sözlərlə başlamaq düzgün deyildir.
İnstitutun gənc əməkdaşının bu məsələləri bilməməyi qəbulediləndir, amma məqalənin sayta yerləşdirilib Feysbuk səhifəsində paylaşılması qurumun rəhbərliyinin səriştəsizliyinin göstəricisidir.
Məqalənin xülasəsini oxudum, xülasə deyildi, sözçülük idi, nəticə hissəsinə baxdım və bununla da düşündüm ki, bu qurumda hələ də akademik mətnlər haqqında təsəvvürü olan yoxdur ki, belə yazılar rəhbərlik tərəfindən elmi ictimaiyyətin qarşısına çıxarılır.
Ən böyük dərd isə odur ki, belə ciddi səhvləri görüb çağırış edən yoxdur, məqaləni oxumayanların paylaşmanın altında ad günü təbriki kimi mesajları vardır... Dərddir!"