Tələbə sayını süni artırmaq təhsilin keyfiyyətinə zərər verir
Elm və təhsil naziri Emin Əmrullayev çıxışı zamanı bildirib ki, universitet maddi gəlirin artması üçün tələbə sayını artırmaqdansa, tələbə sayını azaldıb təhsilin keyfiyyətini yüksəltməlidir.
Mövzu ilə bağlı AzEdu.az-a açıqlama verən ixtisas seçimi və karyera üzrə mütəxəssis, təhsil eksperti Ramin Nurəliyev qeyd edib ki, Azərbaycanın ali təhsil müəssisələri əsasən dövlətdən gələn ödənişlər və ödənişli əsaslarla təhsil alan tələbələrin haqqı hesabına fəaliyyət göstərir:
"Bu vəsait, təbii ki, ali təhsil müəssisələrinin maddi-texniki bazasının gücləndirilməsi, laboratoriyaların qurulması və ya yeni ixtisasların açılması üçün kifayət etmir. Buna görə ali təhsil müəssisələrinin rəhbərləri iş adamları və digər təşkilatlarla əməkdaşlıq qurmalı, beynəlxalq təcrübədən yararlanaraq əlavə maliyyə mənbələri yaratmalıdırlar. Yəni hər şeyi dövlətdən gözləmək doğru deyil. ABŞ, Kanada və Avropa universitetlərinin büdcələri ilə müqayisədə bizim universitetlərin imkanları çox zəifdir və əsas səbəb universitetlərin öz təşəbbüskarlıq göstərməməsidir.
Bununla yanaşı, tələbə sayının süni şəkildə artırılması ilə maliyyə problemini həll etmək düzgün deyil. Bu, tədrisin keyfiyyətinə mənfi təsir göstərir. Əgər biz ali təhsildə real inkişaf görmək istəyiriksə, keyfiyyətə üstünlük verilməlidir. Digər tərəfdən, ali təhsil müəssisələrinin məzunlarının əmək bazarına inteqrasiyasında çətinliklərin yaranmasının səbəbi də məhz praktik biliklərin zəifliyidir. Maddi-texniki baza zəifdir, laboratoriyalar yoxdur, tələbələr yalnız nəzəri biliklərlə kifayətlənirlər. Bu da iş dünyasında onların rəqabət qabiliyyətini azaldır.
Ona görə də universitetlər xarici təhsil ocaqları ilə əməkdaşlıq etməli və onların uğurlu təcrübələrini tətbiq etməlidirlər. Büdcəni genişləndirmək üçün layihələr hazırlanmalı, həmin layihələrə dövlət və özəl sektor nümayəndələri cəlb olunmalıdır. Tenderlər keçirilərək yeni tikinti işləri, kampusların qurulması və filialların açılması mümkündür.
Hazırda sadəcə inzibati binada fəaliyyət göstərən universitetlərə xarici tələbələr maraq göstərmir, hətta bunu gülünc hesab edirlər. Bütün fakültələr, dekanlıqlar və laboratoriyalar bir binada yerləşir. Bu, ali təhsil müəssisəsinin passiv fəaliyyətindən irəli gəlir. Mütləq beynəlxalq təcrübədən yararlanmaq və inkişaf istiqamətində ciddi addımlar atmaq lazımdır"
