Müəllimlərin dərəcə haqsızlığı: Qeyri-ixtisaslı müəllimlərin maaşları niyə azaldıldı?

Son zamanlar ölkənin bir sıra bölgələrində bağça müəllimlərinin maaş artımlarında ədalətsizlik müşahidə olunur. Belə ki, dövlət tərəfindən müəllimlərin əmək fəaliyyətinə uyğun olaraq 3, 5, 8 və 12 illik iş stajı əsasında dərəcə artımları tətbiq edilir. Bu artımlar əməkhaqqının yüksəldilməsinə səbəb olur.

Lakin qeyri-ixtisaslı müəllimlər adlandırılan bəzi müəllimlərin dərəcələri ani şəkildə ləğv edilib. Nəticədə onların əməkhaqlarında 50, 70, bəzən isə 80 manata qədər azalmalar baş verib. Bu hal yüzlərlə təcrübəli müəllimin narazılığına səbəb olub və mövzu ictimailəşib. Məsələ ilə bağlı bir çox şikayətlər ünvanlanıb, hətta bəzi televiziya kanallarında Təhsil Nazirliyinin əməkdaşları dərəcələrin bərpası ilə bağlı açıqlamalar veriblər.

Bəzi bölgələrdə bu haqsızlıq aradan qaldırılsa da, digər bölgələrdə problem hələ də qalmaqdadır. Bu müəllimlər üçün diaqnostik qiymətləndirmə imtahanı keçirilib və onlar yüksək nəticələr göstəriblər. Onların arasında illərlə ibtidai sinif müəllimi kimi çalışan və 49 bal toplayan müəllimlər də var. Nazirliyə ünvanlanan məktublara müsbət cavab gəlsə də, praktikada dərəcələr bərpa olunmur.

Qeyri-ixtisaslı müəllimlər haqlı olaraq sual edirlər: “Əgər nəticəmiz yüksəkdirsə, illərlə təcrübəmiz varsa, niyə əməkhaqqımız azaldılır?” Onlar bildirirlər ki, Prezident İlham Əliyev daim vətəndaşların sosial rifahını yüksəltmək üçün əməkhaqlarını artırır, lakin bəzi yerli təhsil rəhbərləri bu siyasətə zidd olaraq səlahiyyətlərindən sui-istifadə edərək müəllimlərin maaşını azaldırlar.

Şikayətçilərin sözlərinə görə, səsini çıxaran bölgələrdə problemlər qismən aradan qalxıb, digər bölgələrdə isə bu ədalətsizlik davam edir. Onlar məsələ ilə bağlı dəfələrlə müraciət etsələr də, nəticə əldə edə bilməyiblər.

Qeyri-ixtisaslı müəllimlər sonda bir daha aidiyyəti qurumlara çağırış edirlər:
“Biz də dövlətin müəllimləriyik. Əmək fəaliyyətimiz və təcrübəmiz var. Dərəcələrimizin bərpa olunması, haqsız yerə kəsilən maaşlarımızın geri qaytarılması üçün səsimizə səs verin.”