Sertifikasiya imtahanlarının keçirilməsinin üçüncü günüdür. Şikayətlərin isə ardı-arası kəsilmir. Bunların içərisində Azərbaycan dili və ədəbiyyatı müəllimləri çoxluq təşkil edir. Təəssüf ki, hətta yaranmış problemlə bağlı intihar etməyə çalışan müəllimlərimiz də var. Müəllimlərimizi çox dərindən sarsıdan və qərəzli münasibəti açıq-aydın ortaya qoyan bir imtahan keçirildi. Çətinlik səviyyəsi və vaxt faktoru nəzərə alınmadı. Dünən MİQ - də 90-100 arası bal toplayanlar bu gün 40-41 bal topladılar.

Tehsil.media saytı bildirir ki, təlimçilər və müəllimlər artıq 3 gündür davamlı şikayət edib Elm və Təhsil Nazirliyindən rəsmi cavab gözləsə də, Nazirlikdən heç bir açıqlama gəlmir. Bu mənzərə qarşısında səbrsiz qalan müəllimlər artıq problemin nə 35% artımın olmaması üçün qurulan tələ, nə də müəllimləri nüfuzdan salmaq üçün birbaşa atılan addım olduğunu düşünmürlər. Hətta artıq insanlar bunu xarici qüvvələr fonunda Azərbaycan dilinin məhv edilməsi, dövlətçiliyimizin, milli- mənəvi dəyərlərimizin bilərək aradan çıxarılması kimi qələmə verirlər. Heç bir sual izahı yox, heç bir rəsmi cavab yoxdur. Bu isə müəllimləri daha da narahat edir. Artıq mitinq etməyi düşünürlər.

Maraqlıdır ki, bir Naziri öz sahəsi üzrə insanlara bu qədər qəddarcasına yanaşmağa nə vadar edir?